प्रेम आचार्यले नाम लिएका व्यक्तिहरुविरुद्ध आत्महत्या दुरुत्साहनको जाहेरी

काठमाडौं- प्रेमप्रसाद आचार्यले आत्मदाह गर्नुको कारणबारे उल्लेख गरेका व्यक्तिहरुविरुद्ध आत्महत्या दुरुत्साहनको जाहेरी दर्ता भएको छ।

अधिवक्ता स्वागत नेपालको टोलीले बिहीबार आचार्यले उल्लेख गरेका सबै व्यक्ति तथा संस्थाविरुद्ध जिल्ला प्रहरी परिसर काठमाडौंमा किटानी जाहेरी दर्ता गरेको हो।

आज नै मृतक आचार्यकी पत्नी नानुका अधिकारीले पनि प्रहरी परिसर टेकुमा किटानी जाहेरी दिएकी छन्।

आचार्यले आफ्नो फेसबुक प्रोफाइलमा नाम चलेका डिपार्टमेण्टल स्टोर, मार्ट, कलेजलगायत धेरै व्यक्ति तथा संस्थाहरुले उधारो नतिरेको र आफू ऋणमा डुबेको बताएका छन्। आफूलाई यो अवस्थामा पुर्‍याउनमा सरकार र कानुन पनि जिम्मेवार रहेको उनले बताएका छन्।

मंगलबार बानेश्वरस्थित संसद् भवन अगाडि शरीरमा पेट्रोल छर्केर आगो लगाएका इलामका व्यवसायी प्रेमप्रसाद आचार्यको भोलिपल्ट बिहान अस्पतालमा मृत्यु भएको थियो।