प्रेम आत्मदाहपछि पुराना नेतालाई दोष लगाउँदै रविले लेखे- नयाँको आगमनले पनि उत्साह थप्न सकेन

काठमाडौं- उपप्रधान एवम् गृहमन्त्री रवि लामिछानेले एउटा नागरिकले आत्मदाह गर्नुपर्ने अवस्थाको सिर्जना हुनु मुलकका लागि ठूलो दुर्भाग्य भएको बताएका छन्।

सामाजिक सञ्जालमार्तफ गृहमन्त्री लामिछानेले आत्मदाहको निर्णय हिजो देखिको निराशा र पीडाको परिणाम भएको टिप्पणी गरेका छन्। 

नयाँ अनुहारको आगमनलेसमेत जनतामा उत्साह थप्न नसकेको भन्दै उनले दु:ख लागेको बताए। 'एउटा नागरिकले अत्मदाह गर्नुपर्ने परिस्थितिको वर्णन गर्न अब के नै बाँकी रह्यो र? यस्तै परिस्थितिका कारण शान्त बिद्रोह गरेर हामी हिजो भर्खर राजनीतिमा र आज भर्खर सरकारमा सामेल छौं। मलाई थाहा छ, आत्मदाहको निर्णय हिजो देखिको निराशा र पीडाको परिणाम हो। दु:ख त मलाई यसमा लागेको छ कि हामी जस्ता नयाँहरूको आगमनले समेत तपाईंमा उत्साह थप्न सकेन, आशा जगाउन सकेन, आत्मदाहको निर्णय फेर्न सकेन। यसमा हामी दोषी छौं, म दोषी छु। प्रेम आचार्य जी, नयाँ राजनीतिक दल र नेताको रूपमा तपाईंमा आशा जगाउन सकिनौं,  हामीलाई  माफ गर्नुहोला। तपाईंको आत्माले चिर शान्ति पाओस्, परिवारलाई यो पीडा सहने शक्ति मिलोस्।'