खेलकुद बोर्डका पदाधिकारी परिवर्तन राजनीतिक सहमतिमा: मन्त्री राजभण्डारी

विराटनगर– प्रदेश १ का सामाजिक विकास मन्त्री बुद्धिकुमार राजभण्डारीले प्रदेश खेलकुद विकास बोर्डका पदाधिकारी राजनीतिक सहमतिका आधारमा परिवर्तन हुने बताएका छन्। गठबन्धनको सरकार भएकाले सत्तारुढ दलहरुबीचको सहमतिका आधारमा बोर्डका पदाधिकारीबारे निर्णय हुने बताएका हुन्।

सोमबार सामाजिक विकास मन्त्रालयको पदभार ग्रहणपछि मन्त्रालयका कर्मचारीहरुसँगको परिचयात्मक कार्यक्रममा मन्त्री राजभण्डारीले खेलकुद बोर्डबारे सत्तारुढ दलहरुबीच छलफल हुने उनले बताए। बोर्डका पदाधिकारी परिवर्तनको निर्णय भए पदाधिकारीले स्वाभाविक रुपमा लिनुपर्ने उनको भनाइ छ। उनले भने, ‘अदालत धाउने, रातोपिरो हुने काम नै छैन।’ 

प्रदेश खेलकुद विकास बोर्डको उपाध्यक्षमा नेपाली कांग्रेस निकट जिना कार्की, सदस्य सचिवमा एकिकृत समाजवादी निकट हंसराज वाग्ले लगायतका पदाधिकारी छन्। यसअघि भीम आचार्य नेतृत्वको सरकारको समयमा ०७८ असोज २४ गते नियुक्त भएका एमाले निकट सदस्य सचिव पर्शुराम बस्नेतलाई बर्खास्त गर्दै राजेन्द्र राई नेतृत्वको सरकारले ०७८ चैत २२ गते उपाध्यक्षमा कार्की, सदस्य सचिवमा वाग्लेलाई नियुक्त गरेको थियो।