जिउँदो शिशुलाई मृत घोषणा गरेपछि कुटिए डाक्टर

विराटनगरस्थित कोसी अस्पतालमा डाक्टर कुटिएका छन्। नवजात शिशुलाई मृत घोषणा गरेपछि डाक्टरमाथि कुटपिट भएको हो।

मोरङको जहदा-३ भातिगञ्जका दीलिप मुखियाकी १८ दिनकी शिशुलाई कोसी अस्पतालका डा. अनिल यादवले मृत घोषणा गरेका थिए। तर शिशु जीवित भेटिइन्। उनको अहिले गोल्डेन अस्पतालको एनआइसीयू कक्षमा उपचार भइरहेको छ।

कोसीमा मृत घोषणा गरेपछि गोल्डेन अस्पतालमा लैजाँदा शिशु जीवित भएको त्यहाँका डाक्टरले बताएपछि आक्रोशित परिवार र आफन्त डाक्टर यादवमाथि खनिएका  हुन्। श्वासप्रश्वासमा समस्या भएपछि मुखिया परिवारले आज बिहान शिशुलाई उपचारका लागि कोसी अस्पताल ल्याएका थिए। राम्रोसँग परीक्षण नै नगरी यादवले मृत घोषणा गरेको परिवारको आरोप छ।

दीलिपकी पत्नी उमाले पुस १७ मा छोरीलाई जन्म दिएकी थिइन्। जन्मिदा शिशुको तौल १ किलो ४ सय ग्राम थियो र अस्पतालमा केही दिनको बसाइपछि डिस्चार्ज गरिएको थियो। दीलिपले भने, 'इमर्जेन्सीमा राखेपछि डाक्टर यादवले छोरीको स्वास्थ्य जाँच गरेका थिए। त्यसपछि छोरीको सास छैन घर लैजानू भने।'

उनका अनुसार डाक्टरले मृत घोषणा गरेपछि बाहिर निकालिएकी शिशुले हातखुट्टा हल्लाएकी थिइन्। दीलिपले भने, 'बिरामीको उपचारमा लापरबाही गर्ने यस्तो चिकित्सकलाई कडा कारबाही हुनुपर्छ।'

घटनाबारे अनुसन्धान भइरहेको मोरङ प्रहरीले जनाएको छ।