विमान दुर्घटनाको शोकमा सार्वजनिक बिदा

काठमाडौं- सरकारले पोखरामा भएको विमान दुर्घटनाको शोकमा एक दिन सार्वजनिक बिदा दिने निर्णय गरेको छ। आज आइतबार दिउँसो बसेको मन्त्रिपरिषद्‍को आकस्मिक बैठकले भोलि सोमबार शोक बिदा दिने निर्णय गरेको सरकारका प्रवक्ता विष्णु पौडेलले जानकारी दिए।

साथै बैठकले विमान दुर्घटनाबारे छानबिन गर्न पाँच सदस्यीय समिति गठन गरेको छ। पूर्व सचिव नागेन्द्र घिमिरे संयोजक रहेको समितिमा दीपकप्रकाश बास्तोला, सुनील थापा, 

निराजन थापा छन्। समितिको सदस्यसचिवमा पर्यटन मन्त्रालयका सहसिचव बुद्धिसागर लामिछाने छन्। समितिलाई प्रतिवेदन तयार पार्न ४५ दिनको समय दिइएको छ। 

विमान दुर्घटनालगत्तै प्रधानमन्त्री पुष्पकमल दाहालले मन्त्रिरिषद् बैठक डाकेका थिए भने गृहमन्त्रीलाई लिएर त्रिभुवन विमानस्थल पुगेका थिए। 

मन्त्रिपरिषद् बैठक सकेर प्रधानमन्त्री दाहाल पोखरा प्रस्थान गरेका छन्। उनीसँगै गृहमन्त्री रवि लामिछाने पनि पोखरा गएका छन्।