यस्ता छन् कागतीका फाइदा, दिनमा कति खाने?

काठमाडौं– कागती भिटामिन ‘सी’ को महत्वपूर्ण स्रोत हो। मेडिकल न्यूज टूडे डटकमका अनुसार एउटा कागतीमा ३० मिलिग्रामसम्म भिटामिन सी हुन्छ।

कागती सदावहार फल पनि हो। यो स्वास्थ्यको लागि अत्यन्त लाभदायक मानिन्छ। गर्मी याममा वयस्क व्यक्तिका लागि दिनमा दुई वटा कागती आवश्यक पर्छ। अन्य समयमा त्योभन्दा कम खाँदा पनि हुन्छ।

फाइदाहरुः

१. कागती पेटको लागि लाभदायक छ। यसले पाचन प्रक्रिया राम्रो बनाउँछ र पेट सफा राख्छ।

२. मोटोपन कम गर्न पनि कागती पानीले सघाउँछ। तातो पानीमा कागती हालेर नियमित सेवन गर्नाले मोटापन कम घट्छ। अर्थात् कागतीले शरीरको तौल नियन्त्रणमा राख्छ।

३. कागती, मह र तातो पानी मिलाएर खाँदा रुघाखोकी ठिक हुन्छ।

४. कागतीले रक्तचाप घटाउन मद्दत गर्छ। यसले मुटु रोगको जोखिम पनि कम गर्छ।

५. कागतीले रोग प्रतिरोधात्मक क्षमता वृद्धि गर्छ। यसले पत्थरीको जोखिम पनि कम गर्छ।

६. कागतीको रस कपालमा लगाउँदा चायाँबाट मुक्ति मिल्छ। तोरीको तेलमा कागती मिलाएर लगाउँदा कपाल चम्किलो बन्नुको साथै झर्ने समस्या पनि हट्छ।