आगलागीमा परी पाँचथरमा दुई महिलाको मृत्यु

पाँचथर- आगलागीमा परी पाँचथरको फिदिम नगरपालिका ८ का दुई महिलाको मृत्यु भएको छ। स्थानीय मेगबहादुर गुरुङको घरमा आगलागी हुँदा उनकी छोरी र बुहारीको मृत्यु भएको हो।

ज्यान गुमाउनेमा गुरुङकी बुहारी २३ वर्षीया आसानसिंह थेबे र २२ वर्षीय छोरी ममता गुरुङ रहेको जिल्ला प्रहरी कार्यालय पाँचथरले जनाएको छ।

आगलागीमा परी ५५ वर्षीय मेघबहादुर गुरुङ र छोरा बिजेन्द्र गुरुङ घाइते भएका छन्। घाइतेको अवस्था सामान्य रहेको प्रहरीले जनाएको छ। उनीहरूलाई उपचारार्थ पाँचथर अस्पतालमा ल्याइएको छ।

उक्त घरमा ७ जना सुतेकोमा २ जनाको ज्यान गएको‚ २ जना घाइते भएको र ३ जना भागेर बच्न सफल भएको जिल्ला प्रहरी कार्यालय पाँचथरका प्रमुख (डीएसपी) हरि खतिवडाले बताए।

आगलागीबाट ५० लाख रुपैयाँ बराबरको क्षति भएको प्रहरीको प्रारम्भिक अनुमान छ। आगलागीको कारण भने खुलेको छैन।