प्रहरी मुख्यालय पुगेर गृहमन्त्री लामिछानेले भने– सरुवा-बढुवा हुन नेताका घरदैलो गए कारबाही

काठमाडौं– राष्ट्रिय स्वतन्त्र पार्टीका अध्यक्ष तथा उपप्रधान एवं गृहमन्त्री रवि लामिछानेले प्रहरी कर्मचारीले सरुवा–बढुवाका लागि नेताहरुका घरदैलो धाएको जानकारी पाए कारबाही गरिने चेतावनी दिएका छन्।

शुक्रबार प्रहरी प्रधान कार्यालय नक्साल पुगेर गृहमन्त्री लामिछानेले प्रहरी कर्मचारीको सरुवा र बढुवा मापदण्ड बाहिरबाट नहुने बताएका हुन्।

लामिछाने गृहमन्त्री बनेपछि पहिलो पटक निरीक्षणका लागि प्रहरी मुख्यालय पुगेका हुन्। ‘सरुवा र बढुवाका लागि नेताका घर–घर जाने कुरा अन्त्य गरिनेछ। हाम्रोभन्दा पनि राम्रो मान्छे प्राथमिकतामा पर्नेछन्,’ उनले भने।

राम्रो काम गर्ने प्रहरी कर्मचारीलाई पुरस्कृत र आचरण विपरितका क्रियाकलाप गर्नेलाई दण्डित गरिने उनले स्पष्ट पारे। गृहमन्त्री लामिछानेले भने, ‘हिजोका दिनमा जे–जे भए भए पनि आगामी दिनमा कसैले कानुनी विपरीतका क्रियाकलाप नगरोस्।’ उनले प्रहरीको सेवा, सुविधा, रासन र तलब स्केल सबैको पुनरवलोकन गरिने जानकारी दिए।

उक्त अवसरमा प्रहरी महानिरीक्षक धीरजप्रताप सिंहले प्रहरीमा सरुवा, बढुवाका लागि मापदण्ड बनाइएकाले त्यसलाई अक्षरशः पालना गर्ने प्रतिबद्धता जनाए।