आज काठमाडौंको न्यूतनम तापक्रम ४ दशमलव ३ डिग्री सेल्सियस

काठमाडौं- प्रदेश १, गण्डकी, कर्णाली र सुदूरपश्चिम प्रदेशका पहाडी क्षेत्रका एक–दुई ठाउँमा आज शुक्रबार हल्का पानी पर्ने अनुमान गरिएको छ। हिमाली जिल्लामा हल्का हिमपात र तराईका जिल्लामा बाक्लो हुस्सु, कुहिरोको सम्भावना रहेको मौसमविद् विनु महर्जनले बताए।

देशभर अधिकतम र न्यूनतम तापक्रम घटिरहेकाले चिसो बढ्दै गएको छ। चिसो हावा र बाक्लो हुस्सु कुहिरोले जाडो अझ बढाएको छ। काठमाडौंको न्यूनतम तापक्रम केही दिनअघिको भन्दा बढेको छ। तर अधिकतम तापक्रम लगातार घटिरहेको छ। अस्ति १७ दशमलव ४ डिग्री सेल्सियस रहेको काठमाडौंको अधिकतम तापक्रम हिजो १६ दशमलव २ डिग्री सेल्सियसमा झरेको छ।

जाडोयाममा आकाश खुल्यो भने राति र बिहान चिसो धेरै हुन्छ। न्यूनतम तापक्रम घट्छ। यस्तै दिउँसो पारिलो घाम लागे अधिकतम तापक्रम बढ्छ तर मौसम धुम्म भए घट्छ। हिजो आंशिक बदली भएकाले अधिकतम तापक्रम घटेको मौसमविद् विनु महर्जनले बताए। 

आज काठमाडौंको न्यूतनम तापक्रम ४ दशमलव ३ डिग्री सेल्सियस छ।