देशभर चिसो बढेसँगै सावधानी अपनाउन आग्रह

काठमाडौं– पछिल्लो केही दिनयता देशभर चिसो बढेको छ। काठमाडौंको तापक्रम मंगलबारको तुलनामा एक डिग्री सेल्सियस घटेको छ। 

मंगलबार ४ दशमलव ४ डिग्री सेल्सियस रहेकोमा आज न्यूनतम तापक्रम ३ दशमलव ४ डिग्री सेल्सियसमा झरेको मौसम विज्ञान विभागले जनाएको छ। 

देशभरकै तापक्रम क्रमिक रुपमा घट्दै गइरहेको छ। यता वीरेन्द्रनगरको न्यूनतम तापक्रम ३ दशमलव १ डिग्री सेल्सियस छ। सबैभन्दा कम जुम्लाको तापक्रम रहेको छ। जुम्लामा आज बिहान मापन गरिएको तापक्रम अनुसार माइनस ६.५ डिग्री सेल्सियस रहेको छ। 

यस्तै, ताप्लेजुङको ३ दशमलव ५, लुम्लेको ४, डडेल्धुराको ४ दशमलव ४ डिग्री सेल्सियस छ । जिरीको न्यूनतम तापक्रम माइनस १ दशमलव ८ र जोमसोमको माइनस ५ डिग्री सेल्सियस छ। न्यूनतमसँगै देशभरकै अधिकतम तापक्रम पनि घट्न थालेको छ।

अहिले पहाडीसहित तराईका जिल्लामा हुस्सु कुहिरो लागेको छ। पहाडी क्षेत्रको कुहिरो हटेर घाम लाग्ने सम्भावना छ तर तराईका जिल्लामा दिउँसोसम्म नै हुस्सु कुहिरो लाग्ने सम्भावना रहेको छ। आज प्रदेश १ को पहाडी क्षेत्रको मौमस आंशिकदेखि सामान्य बद्ली हुने र बाँकी ठाउँको मौसम सामान्यतया सफा रहने छ।

चिसो बढेसँगै बालबालिका र वृद्धवृद्धा बढी प्रभावित हुने भएकाले उच्च सतर्कता अपनाउन महाशाखाले आग्रह गरेको छ।