बागमती प्रदेशसभामा बढ्यो महिला प्रतिनिधित्व

काठमाडौं– बागमती प्रदेशसभाको दोस्रो कार्यकालमा महिला प्रतिनिधित्व बढेको छ। ११० प्रदेशसभा सदस्य रहेको पहिलो प्रदेशसभामा प्रत्यक्ष र समानुपातिक प्रणालीबाट गरी ३७ जना महिला प्रदेशसभा सदस्य थिए। गत ४ मंसिरमा सम्पन्न निर्वाचनबाट प्रत्यक्ष र समानुपातिक प्रणालीबाट गरी ४० जना महिला प्रदेशसभा सदस्यमा निर्वाचित भएका छन्। 

पहिलो र दोस्रो पटक भएको प्रदेशसभा सदस्य निर्वाचनमा पहिलो निर्वाचित हुने प्रणालीबाट प्रदेशमा समान पाँच–पाँच जना महिला प्रदेशसभा सदस्यमा निर्वाचित भएका छन्।

पहिलो प्रदेशसभाको कार्यकालमा समानुपातिकतर्फ विभिन्न दलबाट गरी ३३.६३ प्रतिशत अर्थात् ३२ जना महिला र १२ पुरुषको प्रदेशसभामा प्रतिनिधित्व थियो।

दोस्रो कार्यकालका लागि पुरुष प्रदेशसभा सदस्यको संख्या ९ मा झरेको छ भने महिला प्रदेशसभा सदस्यको संख्या बढेर ३५ जना अर्थात् ३६.३६ प्रतिशत पुगेको छ। बागमती प्रदेशको पहिलो प्रदेशसभामा कांग्रेसका महिला र पुरुष  सात–सात, एमालेका महिला मात्र १६, नेकपा माओवादी केन्द्रका पाँच महिला र तीन पुरुष, विवेकशील साझा पार्टीका एक महिला र दुई पुरुष, राष्ट्रिय प्रजातन्त्र पार्टीका दुई महिला र नेपाल मजदुर किसान पार्टीका एक महिलाले समानुपातिक प्रणालीबाट प्रतिनिधित्व गरेका थिए।

यस्तै, दोस्रो प्रदेश सभा कार्यकालमा समानुपातिक प्रणालीबाट कांग्रेसका महिला ११  र पुरुष एक, एमालेका महिला ९ र पुरुष पाँच, माओवादी केन्द्रका महिला पाँच र पुरुष दुई, राष्ट्रिय प्रजातन्त्र पार्टीका पाँच महिला र एक पुरुष, नेपाल मजदुर किसान पार्टीका दुई महिला र हाम्रो नेपाली पार्टीबाट एक महिला प्रदेशसभामा पहिलो पटक निर्वाचित भएका हुन्। समावेशी सिद्धान्तअनुसार बागमती प्रदेशसभाको दोस्रो कार्यकालका लागि समानुपातिक प्रणालीतर्फ आदिवासी जनजातिबाट २२ जना, अल्पसंख्यकबाट कांग्रेस, एमाले र माओवादी केन्द्रका गरी तीन, खसआर्यबाट अपांगता भएका एकसहित १७ र दलित प्रदेशसभा सदस्यमा एमाले र कांग्रेसका गरी दुई जना छन्।

आदिवासी जनजातिबाट प्रतिनिधित्व गर्ने २२ मध्ये एमालेका तीन र माओवादी केन्द्रका एक गरी चार पुरुष र १८ महिला तथा खसआर्यतर्फ १७ जनामध्ये एमालेका दुई; कांग्रेस, माओवादी केन्द्र र राप्रपाका एक–एक पुरुष र बाँकी महिला प्रदेशसभा सदस्य समानुपातिक प्रणालीबाट निर्वाचित भएका छन्।

अल्पसंख्यक र दलित समुदायबाट समानुपातिकतर्फ निर्वाचित सबै प्रदेशसभा सदस्य महिला छन्।