टाइम म्यागेजिनको वर्ष व्यक्तिमा जेलेन्स्की

काठमाडौं- विश्व प्रसिद्ध म्यागेजिन टाइमले सन् २०२२ को वर्ष व्यक्तिका रुपमा युक्रेनी राष्ट्रपति भ्लादिमिर जेलेन्स्कीलाई छनोट गरेको छ। रुसी आक्रमणको बहादुरीपूर्वक सामना गरिरहेका जेलेन्स्की यसपटक टाइमको रोजाइमा परेका हुन्। 

यस वर्षका अन्य दाबेदारहरुमा चिनियाँ राष्ट्रपति सी चिनफिङ, अमेरिकी नेतृ लिज चेनी, अर्बपति दाता म्याकिन्जी स्कट आदि थिए।

गत वर्ष इलोन मस्कलाई यो उपाधि दिइएको थियो। टाइमले अभिनेत्री मिसेल योहलाई आइकन अफ दि इयर घोषित गरेको छ। 

टाइम म्यागेजिनले वर्ष व्यक्ति घोषणा गर्ने चलन सन् १९२७ मा सुरु गरेको हो। पहिलो वर्ष अमेरिकी पाइलट चार्ल्स लिन्डवर्ग वर्ष व्यक्ति बनेका थिए। उनले एक्लै न्यूयोर्कदेखि पेरिससम्मको उडान भरेका थिए।

टाइमले वर्षभरिमा विश्वलाई सबैभन्दा बढी प्रभावित पार्ने व्यक्तिलाई वर्ष व्यक्तिको रुपमा घोषणा गर्ने गरेको छ।