अब राष्ट्रिय पार्टी बन्न एकीकृत समाजवादीलाई १७ हजार मत आवश्यक

काठमाडौं- नेकपा एकीकृत समाजवादी पार्टी राष्ट्रिय पार्टी बन्न समानुपातिकतर्फ सदर मतको ३ प्रतिशत थ्रेसहोल्ड कटाउन कठिन संघर्ष गरिरहेको बेला अहिलेसम्म दुई लाख ९४ हजार मत प्राप्त गरेको छ। निर्वाचन आयोगले पछिल्लोपटक सार्वजनिक गरेको विवरण अनुसार नेकपा (एस)को समानुपातिकतर्फ दुई लाख ९४ हजार १८ मत प्राप्त गरेको छ। 

तर यो मत नेकपा एसलाई राष्ट्रिय पार्टी बन्न अपुग देखिन्छ। अहिलेसम्म एक करोड तीन लाख ७९ हजार ३ सय ५८ मत गनिएको छ। यो अवस्थामा थ्रेसहोल्ड कटाउनका लागि कम्तीमा पनि ३ लाख ११ हजार ३ सय ८० मत चाहिन्छ। 

नेकपा एसलाई अहिलेकै अवस्थामा थ्रेसहोल्ड कटाउन १७ हजार ३ सय भन्दा धेरै मत अपुग देखिन्छ। सबैभन्दा धेरै मत पाएर नेकपा एमाले अग्रस्थानमा छ। एमालेले २७ लाख ७२ हजार ९ सय ८५ मत पाएको छ भने नेपाली कांग्रेसले २६ लाख ४३ हजार २९६ मत प्राप्त गरेर दोस्रो स्थानमा छ। 

नेकपा माओवादी केन्द्रले ११ लाख ६१ हजार १ सय ७३ मत पाएका छ। चौथोँ स्थानमा राष्ट्रिय स्वतन्त्र पार्टीले ११ लाख १९ हजार ४ सय १६ तथा राष्ट्रिय प्रजातन्त्र पार्टीले पाँचौँ स्थानमा ५ लाख ८५ हजार ८ सय ८७ मत पाएको छ। 

जनता समाजवादी पार्टीले ४ लाख २० हजार ९ सय २८ तथा जनमत पार्टीले ३ लाख ९४ हजार ३ सय ४० मत पाएको छ। नागरिक उन्मुक्ति पार्टीले २ लाख ७१ हजार ६५७ मत पाएको छ भने लोकतान्त्रिक समाजवादी पार्टीले १ लाख ६७ हजार २ सय ७८ मत पाएको छ। अरु कुनै पनि पार्टीले एक लाख मत कटाएका छैनन्। 

यो निर्वाचनमा जम्मा १ करोड ७९ लाख ८८ हजार पाँच सय ७० मतदाता थिए। त्यसमध्ये ६१ प्रतिशत अर्थात् करिब १ करोड ९ लाख हाराहारीमा मत खसेको थियो। राजनीतिक दलसम्बन्धी ऐनमा प्रतिनिधिसभाको निर्वाचनमा समानुपातिक निर्वाचन प्रणालीतर्फ खसेको सदर मतको कम्तीमा ३ प्रतिशत मत र पहिलो हुने निर्वाचित हुने निर्वाचन प्रणालीतर्फ एक सिट प्राप्त गर्ने दलले मात्र राष्ट्रिय दलको मान्यता प्राप्त गर्ने उल्लेख छ।

अहिलेसम्म सात दलले ‘थ्रेस होल्ड’ सीमा पार गरिसकेका छन्। एमाले, कांग्रेस, माओवादी केन्द्र, राष्ट्रिय स्वतन्त्र पार्टी, राप्रपा, जसपा नेपाल र जनमत पार्टीले गणना भएको मतबाट ३ प्रतिशतभन्दा बढी मत कटाएका छन्।