बाजुरा र स्याङ्जाको मतगणना माग गर्दै निर्वाचन आयोग पुग्यो कांग्रेस

काठमाडौं– नेपाली कांग्रेसले स्याङ्जा २ र बाजुराको मत गणना सुरु गर्न निर्वाचन आयोगलाई आग्रह गरेको छ। मंगलबार कांग्रेसका वरिष्ठ नेता रामचन्द्र पौडेल, उपसभापति धनराज गुरुङ, प्रदीप पौडेललगायतको टोली निर्वाचन आयोग पुगेर स्याङ्जा २ र बाजुराको मतगणना सुरु गर्न आग्रह गरेको हो। 

कांग्रेस नेताहरुले प्रमुख निर्वाचन आयुक्त दिनेशकुमार थपलिया र आयुक्तसँग भेट गरी तत्काल मतगणना सुरु गर्न आग्रह गरे।  ‘स्याङ्जा २ को मत गणना स्थगित भएको विषयमा आयोगमा आएका हौं। बाजुरामा पनि स्थगित गर्नु नपर्ने ठाउँमा स्थगित भएको छ। कयौं ठाउँमा स्थगित गरेर  पुनः गर्नू भनेको छ’, नेता पौडेलले भने।

उनले स्याङ्जा २ मा स्वतन्त्र निर्वाचन सम्पन्न भएकाले मतगणना रोक्नु आवश्यक नभएको बताए। निर्वाचन अवधिभर कुनै पनि घटना नघटेकाले आयोगले छानबिन समिति गठन गर्नु गलत रहेको उनको दाबी छ।

‘स्याङ्जामा निर्वाचन आयोगले बनाएको मतपत्रअनुसार मत खसेको छ। त्यहाँ कुन मान्छे कहाँ छ भन्ने कुराको कुरा होइन। मतदाता नामावलीमा नाम भएका मानिसको भोट खसेको छ। मतदान सम्पन्न भयो भनेर सबै दल र त्यहाँका पदाधिकारीले हस्ताक्षर गरेर, मुचुल्का गरेर पठाएको कुरालाई रोक्न आवश्यक थिएन,’ वरिष्ठ नेता पौडेलले भने।