१३ मंसिरभित्रै तीन जिल्लाबाहेकको मत परिणाम सार्वजनिक भइसक्ने

काठमाडौं– गत ४ मंसिरमा सम्पन्न प्रतिनिधिसभा तथा प्रदेशसभा निर्वाचनको मत परिणाम अन्तिम चरणमा पुगेको छ। निर्वाचन आयोगका अनुसार प्रतिनिधिसभाको प्रत्यक्षतर्फ नेपाली कांग्रेसले सबैभन्दा बढी मत प्राप्त गरेको छ। हालसम्म कांग्रेसले प्रतिनिधिसभाको प्रत्यक्षतर्फ कांग्रेसले ५३ स्थानमा जित हासिल गरेको छ भने ३ स्थानमा अग्रता कायम गरेको छ ।

त्यसैगरी नेकपा एमाले ४३ स्थानमा विजयी भएको छ। नेकपा (माओवादी केन्द्र)ले १७, नेकपा (एकीकृत समाजवादी)ले १०, राष्ट्रिय प्रजातन्त्र पार्टी र राष्ट्रिय स्वतन्त्र पार्टीले सात/सात, जनता समाजवादी पार्टी नेपालले ६ स्थानमा जित हासिल गरेको छ भने एक स्थानमा अग्रता कायम गरेको छ।

स्वतन्त्र पाँच, लोकतान्त्रिक समाजवादी पार्टीले चार र नागरिक उन्मुक्ति पार्टीले तीन स्थानमा विजयी भएका छन्। बाँकी स्थानको केही विवादका कारण निर्वाचन र मत गणनामा भएको ढिलाइ तथा मतगणना स्थागितका कारण समयमै नतिजा आउन सकेको छैन। बाजुरा, दोलखा र स्याङ्जाबाहेक अन्य सबै जिल्लाको प्रत्यक्ष तथा समानुपातिकतर्फको मत परिणाम मंगलबारसम्म आइसक्ने आयोगका प्रवक्ता शालिग्राम शर्मा पौडेलले बताए।

हाल प्रत्यक्षसँगै समानुपातिकको पनि मतगणना जारी रहेकाले उक्त तीन जिल्लाबाहेकको सबै मत परिणाम १३ मंसिरसम्म आइसक्ने पौडेलले जानकारी दिए।

बाजुरा, दोलखा र स्याङ्जामा देखिएको समस्याका सम्बन्धमा आयोगले आवश्यक निर्णय गरी यथाशीघ्र सबै मत परिणाम आइसक्ने आयोगको दाबी छ। अन्तिम मत परिणाम प्राप्त भएपछि त्यसको सम्पूर्ण विवरण आयोगले राष्ट्रपतिलाई बुझाउने कानुनी प्रावधान छ।