निर्वाचन आचारसंहिता उल्लंघन भए चुप बस्दैनौं : थपलिया

काठमाडौं– प्रमुख निर्वाचन आयुक्त दिनेशकुमार थपलियाले निर्वाचन आचारसंहिता र आयोगका निर्देशन अवज्ञा गरिए सह्य नहुने बताएका छन्। बुधबार ४ मंसिरमा हुने प्रतिनिधिसभा र प्रदेशसभा सदस्य निर्वाचनका सन्दर्भमा निर्वाचन आयोगले युवाका संघ–संस्था र युवा अभियन्तासँग गरेको छलफलमा प्रमुख निर्वाचन आयुक्त थपलियाले यस्तो बताएका हुन्।

उनले राजनीतिक दल, उम्मेदवार, सार्वजनिक निकाय र सम्बन्धित पक्षले निर्वाचनलाई स्वच्छ, निष्पक्ष, स्वतन्त्र, भयरहित रूपमा सम्पन्न गराउन सघाउनुपर्ने धारणा व्यक्त गरे।

आचारसंहिता उल्लंघन र निर्देशनको अवज्ञा भए उल्लंघनकर्तालाई महँगो पर्न सक्ने चेतावनी प्रमुख निर्वाचन आयुक्त थपलियाले दिए। । थपलियाले केही स्थानीय तहले मतदाता शिक्षा कार्यक्रम सञ्चालन गर्न नसक्ने जानकारी गराएको सन्दर्भमा ती तहलाई कारबाही हुने स्पष्ट पारे। निर्वाचनको सन्दर्भमा आयोगले दिएका निर्देशनको कसैले अवज्ञा गरे त्यो महँगो हुने उनको चेतावनी छ।

युवालाई सामाजिक सञ्जाल र अन्य माध्यमको उपयोग गरी निर्वाचनको सकारात्मक प्रचार–प्रसार र मतदाता शिक्षा दिन उनले आग्रह गरे।  राजनीतिक दल तथा तिनका उम्मेदवारले  आचारसंहिता उल्लंघन गरे पाइए जुनसुकै माध्यमबाट उजुरी दिने सकिने उनको भनाइ छ। 

उनले भने, ‘जुनसुकै निर्वाचनमा जित्ने उम्मेदवारभन्दा हार्नेको संख्या बढी हुने गरेको छ। निर्वाचनपछिको राजनीतिक वातावरण धूमिल हुन नदिन र सौहार्दता कायम राख्न पनि युवाहरूले सकारात्मक भूमिका वहन गर्नुपर्छ।’

प्रमुख आयुक्त थपलियाले मतदान केन्द्र सकेसम्म अपांगतामैत्री बनाउन आग्रह गरिएको र त्यसतर्फ आयोग सचेत रहेको स्पष्ट पारे। उनले भने, ‘मतदाताको विवेकको मत प्रयोग गराउन मतदान अधिकृत, राजनीतिक दलका प्रतिनिधि र स्वयंसेवकलाई आयोगले सुम्पिएको विश्वासमा कुठाराघात नहोस्। स्वच्छ, निष्पक्ष, स्वतन्त्र, भयरहित निर्वाचन गराउने लक्ष्यमा हामी सबैको सहयोग चाहन्छौं।’