प्रचारमा टोपी प्रयोगबारे प्रचण्ड, नारायणकाजी र रविलाई आयोगको स्पष्टीकरण

काठमाडौं- निर्वाचन आयोगले पुष्पकमल दाहाल ‘प्रचण्ड’, नारायणकाजी श्रेष्ठ र रवि लामिछानेलाई स्पष्टीकरण सोधेको छ। चुनाव प्रचारप्रसारका क्रममा टोपी प्रयोग गरेकोबारे उनीहरुलाई स्पष्टीकरण सोधिएको हो।

नेकपा माओवादी केन्द्रका अध्यक्षसमेत रहेका प्रचण्ड गोरखा–१ बाट प्रतिनिधिसभा सदस्यका उम्मेदवार हुन् भने राष्ट्रिय स्वतन्त्र पार्टीका अध्यक्ष लामिछाने चितवन–३ का। नारायणकाजी भने उम्मेदवार छैनन् तर प्रचण्डको निर्वाचन प्रचारमा खटिएका छन्। 

माओवादी अध्यक्ष प्रचण्ड र उपाध्यक्ष श्रेष्ठसमेत उपस्थित कार्यक्रममा केही व्यक्तिले हँसिया हथौडाको संकेत रहेको नेपाली टोपी प्रयोग गरेको सम्बन्धमा आयोगमा प्राप्त उजुरीका आधारमा स्पष्टीकरण सोधिएको आयोगले जनाएको छ। यस्तै ‘रवि लामिछानेलाई विजयी बनाऔँ, यसपालिको मतदान रवि लामिछानेलाई’ भन्ने बेहोरा छापिएको टोपी प्रयोग गरेको भनी आएको उजुरीका आधारमा लामिछानेलाई स्पष्टीकरण सोधिएको आयोगको भनाइ छ।

निर्वाचन आचारसंहिताको दफा १३ को उपदफा १ को खण्ड घ मा जुलुस वा आमसभामा भाग लिने वा प्रचारप्रसार गर्ने व्यक्तिले दल वा उम्मेदवारको निर्वाचन चिन्ह वा झण्डा अंकित लोगो वा स्टिकर वा कपडा, टोपी वा क्याप, भेष्ट, टिसर्ट, ज्याकेट, कमिज, गम्छा, ब्याच, मास्क वा लकेट लगाउन वा झोला बोक्न नहुने व्यवस्था रहेको छ।

आयोगले तीनै जनालाई पत्र प्राप्त भएको २४ घण्टाभित्र निर्वाचन आयोग नेपाल वा सम्बन्धित जिल्ला निर्वाचन कार्यालय प्राप्त हुने गरी स्पष्टीकरण पेस गर्न निर्देशन दिएको छ।