काठमाडौं-५ मा एमाले र गठबन्धनका उम्मेदवारबीच रोचक प्रतिस्पर्धा

काठमाडौं- मंसिर ४ गते हुने प्रतिनिधिसभा तथा प्रदेशसभा निर्वाचनका लागि मत माग्न उम्मेदवार मतदाताको घरदैलोमा पुगिरहेका छन्।

निर्वाचन आयोगले प्रचारप्रसार खुला गरेसँगै काठमाडौंको ५ नम्बर क्षेत्रमा पनि उम्मेदवार मतदाताका घरदैलोमा आ–आफ्ना चुनावी प्रतिबद्धतासहित पुगेका छन्। निर्वाचनको प्रचारप्रसारले यो क्षेत्रमा पनि अहिले चहलपहल बढेको छ।

आसन्न निर्वाचनमा प्रतिनिधिसभा सदस्यका लागि काठमाडौं–५ मा नेकपा एमालेका तर्फबाट उम्मेदवार पार्टीका वरिष्ठ उपाध्यक्ष ईश्वर पोखरेल र गठबन्धनका उम्मेदवार नेपाली कांग्रेसका युवा नेता प्रदीप पौडेलबीच मुख्य प्रतिस्पर्धा हुने देखिएको छ।

एमालेबाट पोखरेल एक्लै चुनावी मैदानमा छन् भने पौडेललाई गठबन्धनको समर्थन रहेको छ। सो निर्वाचन क्षेत्रमा काठमाडौं महानगरका ४, बूढानीलकण्ठ नगरपालिकाका ५ र टोखा नगरपालिकाका ६ वडा समेटिएका छन्। यो क्षेत्रभित्र काठमाडौं महानगरका २,३,४,५, बूढानीलकण्ठ नगरपालिकाका ३,४,५,६,७ र टोखा नगरपालिकाका २,३,४,५,६,७ वडा छन्। 

गत वैशाखमा भएको स्थानीय तह निर्वाचनमा सो क्षेत्रमा पर्ने १५ वडामा एमालेले ११, कांग्रेसले ३ र स्वतन्त्र एउटा वडामा विजयी भएका छन्। 

स्थानीय तहको चुनावको परिणामलाई हेर्दा एमालेका वडाध्यक्षले कूल १७ हजार ९५२, कांग्रेसका वडाध्यक्षले १२ हजार ५ मत प्राप्त गरेका छन्। एकीकृत समाजवादीले १ हजार ८३९ र माओवादी केन्द्रले ७२० मत प्राप्त गरेका छन्।

सत्ता गठबन्धनमा आबद्ध ३ दलले प्राप्त गरेको मतभन्दा एमाले ३ हजार ३८८ मतान्तरले अगाडि देखिन्छ।

२०७४ निर्वाचनमा एमालेका उम्मेदवार ईश्वर पोखरेल र कांग्रेसका प्रकाशशरण महतबीच भएको प्रतिस्पर्धामा पोखरेल विजयी भएका थिए।

सो क्षेत्रमा अहिले एमाले एक्लै चुनावी मैदान रहेकाले गठबन्धनको साथले कांग्रेस चुनाव जित्ने दाउमा छ भने पोखरेल आफ्नो जितलाई कायम राख्ने कसरतमा छन्।

प्रतिनिधि सभातर्फ निर्वाचन क्षेत्र नम्बर १ मा ३१ मतदानस्थल र ८१ मतदान केन्द्रबाट कूल ७० हजार ९१९ मतदाता रहेका छन्। जसमध्ये महिला ३७ हजार १२५ र पुरुष ३३ हजार ७९१ मतदाता छन्।