लागूऔषध सेवन गरेर गाडी चलाउने चार जना पक्राउ

काठमाडौं- ट्राफिक प्रहरीले काठमाडौंको जगाती क्षेत्रमा विशेष जाँचको क्रममा लागूऔषध सेवन गरेर सवारी चलाउने चार जनालाई पक्राउ गरेको छ।

काठमाडौं उपत्यका ट्राफिक प्रहरी कार्यालय रामशाहपथ, लागूऔषध नियन्त्रण ब्युरो कोटेश्वर, नेपाल प्रहरी अस्पताल, प्रहरी वृत्त जगातीको संयुक्त टोलीले जाँच गर्ने क्रममा लागूऔषध खाएर गाडी चलाएका चार जना पक्राउ गरेको हो।

भक्तपुरको जगाती सडक खण्डमा बा४ख १९५६, बा२४प ११४६, बा७६प ५३८६ र प्रदेश ३–०२–००६ प ८२६ नम्बरको गाडीका चालक पक्राउ परेका हुन्। उनीलाई आवश्यक अनुसन्धान तथा कारबाहीका लागि प्रहरी वृत्त जगातीमा राखिएको काठमाण्डौ उपत्यका ट्राफिक प्रहरी कार्यालयका प्रहरी वरिष्ठ उपरीक्षक राजेन्द्रप्रसाद भट्टले जानकारी दिए।

जगातीबाटै जाँडरक्सी खाएर चलाएका दुई जना चालक पनि ट्राफिक प्रहरीको कारबाहीमा परेका छन्। चालकले लागूऔषध खाएर गाडी चलाए/नचलाएको सम्बन्धमा प्राविधिक टोलीसहित साउन ९ गतेदेखि ट्राफिक प्रहरीले जाँच अभियान सुरु गरेको छ।