१९ मंसिरभित्रै आमसभाको खर्च विवरण बुझाउन राजनीतिक दलहरूलाई आयोगको निर्देशन

काठमाडौं– निर्वाचन आयोगले आगामी ४ मंसिरमा हुने प्रदेशसभा तथा प्रतिनिधिसभामा उम्मेदवार भएकाहरूले निर्वाचन क्षेत्रमा सभा–सम्मेलन आयोजना गर्दाको खर्च विवरण १९ मंसिरभित्रै बुझाउनुपर्ने बताएको छ।

बुधबार आयोगले गरेको पत्रकार सम्मेलनमा प्रमुख निर्वाचन आयुक्त दिनेश थपलियाले जुनसुकै उम्मेदवारले चुनावी क्षेत्रमा चुनावी सभा–सम्मेलन गर्दा भएको खर्च चुनाव सकिएको १५ दिनभित्र पेस गर्न निर्देशन दिइएको बताएका हुन्। 

उनले आयोगले संघीय र प्रदेश सरकारका मन्त्रीले चुनाव प्रचार–प्रसारमा जाँदा अनुमति लिनुपर्ने र अनुमति लिएर चुनाव प्रचारमा गएकाहरूले सरकारी स्रोत–साधन प्रयोग गरे/नगरेको निगरानी गरिने बताए। आयोगले १२ असोजदेखि अहिलेसम्म निर्वाचन आचारसंहिता विपरीत गर्ने ७१ जनालाई स्पष्टीकरण सोधेको उनले जानकारी दिए।

आयोगले उम्मेदवारको चुनावी खर्चको परीक्षण मान्यता प्राप्त लेखापरीक्षकबाट गराइने थपलियाको भनाइ छ। ‘आयोगले उम्मेदवारको चुनावी खर्चलाई अब दर्ता भएका लेखापरीक्षकबाट परीक्षण गराउनेछ। हामीले तोकेको सीमाअनुसार उम्मेदवारको खर्च लेखापरीक्षकले जाँचबुझ गर्नेछन्,’ थपलियाले भने। 

राजनीतिक दल तथा उम्मेदवारले १७ कात्तिकबाट कोणसभा तथा आमसभा गर्न पाउनेछन्। निर्वाचन आचारसंहिता पालना गर्दै गतिविधि गर्न आयोगले राजनीतिक दललाई निर्देशन दिएको छ।