७५ जिल्लामा पुग्यो समानुपातिकको मतपत्र

काठमाडौं- निर्वाचन आयोगले ७५ जिल्लामा समानुपातिक निर्वाचन प्रणालीततर्फको मतपत्र ढुवानी सम्पन्न गरेको छ। प्रत्यक्षतर्फ सोमबारसम्म १६ वटा जिल्लाका मतपत्र ढुवानी भएको छ। समानुपातिकतर्फ मनाङ र मुस्ताङका समानुपातिकको मतपत्र ढुवानी हुन बाँकी छ।

प्रत्यक्षतर्फ कैलाली, कञ्चनपुर, अछाम, डोटी, डडेलधुरा, बझाङ, बैतडी, दार्चुला, नवलपरासी पूर्व, नवलपरासी पश्चिम, बाँके, बर्दिया, जाजरकोट, कालिकोट, दैलेख र सुर्खेतमा मतपत्र पुगेको छ। हुम्ला, जुम्ला, डोल्पा, मुगु र बाजुरा जिल्लाका लागि पठाइएको मतपत्र सुर्खेतसम्म पुगेको छ। सुर्खेतबाट भने हेलिकोप्टरमा राखेर मतपत्र सम्बन्धित जिल्लामा पुर्‍याइनेछ। 

समानुपातिक निर्वाचन प्रणालीअन्तर्गत प्रतिनिधि सभाका लागि देशैभर एउटै मतपत्र प्रयोग हुने छ। प्रत्यक्षतर्फ भने प्रतिनिधि सभा/प्रदेशसभा निर्वाचन क्षेत्रपिच्छे नै फरक मतपत्र हुनेछ। प्रदेश सभाका लागि भने प्रदेशमा कायम रहेका दलको संख्या अनुसार फरक-फरक समानुपातिकको मतपत्र प्रयोग हुनेछ।

आयोगले ढुवानी भएका जिल्लाहरूमा अस्थायी मतदाताहरूका लागि प्रयोग हुने मपतत्रसमेत पठाएको छ। अस्थायी मतदाताको सूचीमा कर्मचारी, सुरक्षाकर्मी, कैदी, वृद्धाश्रमका व्यक्तिलगायतलाई समेटिएको छ। उनीहरुले समानुपातिक निर्वाचन प्रणालीतर्फ प्रतिनिधि सभाका लागि मात मतदान गर्न पाउने छन्।

आयोगले कात्तिक १६ गतेसम्ममा गण्डकी, लुम्बिनी, कर्णाली र सुदूरपश्चिम प्रदेशका सबै जिल्लाहरूमा मतपत्र ढुवानी गरिसक्ने छ।