भक्तपुरको कमलविनायकबाट लागूऔषधसहित दुई जना पक्राउ

भक्तपुर- भक्तपुर नगरपालिका-१० कमलविनायकमा लागूऔषध विक्रीवितरण तथा ओसारपसार गरेको आरोपमा दुई जनालाई प्रहरीले पक्राउ गरेको छ। लागूऔषध विक्रीवितरण तथा ओसारपसार भइरहेको भन्ने विशेष सूचनाको आधारमा प्रहरीले दुई जनालाई नियन्त्रणमा लिएको हो।

पक्राउ पर्नेमा सिन्धुपाल्चोक भोटेकोशी गाउँपालिका-१ घर भई हाल भक्तपुर नगरपालिका-१० कमलविनायक बस्ने  ३३  वर्षीय रविन तामाङ र सोही स्थान भई हाल कमलविनायक नै बस्ने ३४ वर्षीया सुस्मिता खड्का छन्। 

प्रहरी वृत्त जगाती भक्तपुरबाट खटिएको प्रहरी टोलीले निजहरुको डेराकोठामा खान्तलासी गरी हेर्दा लागुऔषधसहित चोरी गरि राखिएका मोटरसाकलको हेल्मेटसमेत फेला पारेको महानगरीय प्रहरी परिसर भक्तपुरले जनाएको छ। 

कानुन बमोजिम बरामद गरी लागूऔषधसम्बन्धी कसुरमा उनीहरूलाई जिल्ला अदालत भक्तपुरमा पेश गरी थप अनुसन्धान कार्य भइरहेको जनाइएको छ। उनीहरूबाट लागुऔषधसहित मोटरसाइकल, हेल्मेट बरामद भएको परिसरका सूचना अधिकृत राजु पाण्डेले बताए।