पत्रकारितामा शुद्धीकरण आवश्यक छ : अध्यक्ष पोखरेल

बुटवल- नेपाल पत्रकार महासंघका केन्द्रीय अध्यक्ष विपुल पोखरेलले पत्रकारितामा शुद्धीकरण आवश्यक रहेको बताएका छन्। आइतबार बुटवलमा भएको नेपाल पत्रकार महासंघ रुपन्देहीको साधरणसभालाई सम्बोधन गर्दै अध्यक्ष पोखरेलले सदस्यता शुद्धीकरणका लागि निर्देशन जारी गरेको बताएका हुन्। 

पत्रकारिता छाडेका, विस्थापित र अन्य पेसामा गइसकेकाहरुलाई बिदाई गर्न महासंघले निर्देशन जारी गरिसकेको जानकारी दिए। अध्यक्ष पोखरेलले निर्वाचन नजिकै आइसकेकाले पत्रकारिताको आलोचनात्मक चेतलाई मर्न नदिन आग्रह गरे। उनले राजनीतिक दलहरुले पत्रकारहरुलाई प्रयोग गर्ने भएकाले तटस्थाको चिरहरण हुन नदिन सचेत हुनुपर्नेमा जोड दिए। 

कार्यक्रममा बोल्दै बुटवल उपमहानगरपालिका प्रमुख खेलराज पाण्डेयले बुटवलमा पत्रकारिताको अध्ययनका लागि बुटवल उपमहानगरले सहकार्य गर्न तयार रहेको बताए। उनले बुटवल उपमहानगरपालिकाले यस क्षेत्रमा पत्रकारिताको गुणस्तर वृद्धि गर्नको लागि कामहरु गरिरहेको बताउँदै आवश्यक छलफल गर्न तयार रहेको बताए। 

रुपन्देहीका प्रमुख जिल्ला अधिकारी भरत पाण्डेले पत्रकारिता क्षेत्रको विकासको लागि स्थानीय प्रशासन साथमा रहेको बताए।