नेसपाले घोषणापत्रमा भन्यो- शासकीय र निर्वाचन प्रणाली त्रुटिपूर्ण

काठमाडौं- नेपाल समाजवादी पार्टीले मङ्सिरमा हुने प्रदेश र प्रतिनिधि सभा सदस्यको निर्वाचन २०७९- का लागि घोषणापत्र सार्वजनिक गरेको छ। नेकपा माओवादी केन्द्रको चुनाव चिह्न हसियाहथौडाबाट चुनाव लड्नका लागि उम्मेदवारको मनोनयनसमेत गराएको नेसपाले आइतबार तीन खण्डमा रहेको घोषणापत्र सार्वजनिक गरेको हो। 

डा बाबुराम भट्टराई नेतृत्वको नेसपाले हालको निर्वाचन र शासकीय प्रणाली त्रुटिपूर्ण रहेको उल्लेख गरेको छ। ‘यो औपचारिक लोकतन्त्रलाई पूर्ण लोकतन्त्रमा रूपान्तरण गर्न वर्तमान संविधानमा प्रत्यक्ष निर्वाचित राष्ट्रपतीय प्रणाली लगायतका निम्ति संशोधन गर्नु पर्दछ,' घोषणापत्रमा उल्लेख छ। 

नेसपाले निर्वाचन प्रणाली र शासकीय स्वरूपमा गम्भीर त्रुटि रहेको र त्यो त्रुटि नसच्याएसम्म देशमा राजनीतिक स्थिरता नहुने ठहर गरेको छ। 

नेसपाले घोषणापत्रमा लोकतन्त्रको लोकतान्त्रिकरणका लागि १० बुँदे संकल्प अघि सारेको छ। प्रदेशहरूको पुनर्संरचना, दलका सबै तहमा प्राइमरी इलेक्सन, प्रत्यक्ष निर्वाचित राष्ट्रपति र प्रदेश प्रमुखमा एक व्यक्ति एक कार्यकालभन्दा बढी हुन नपाउने, स्वतन्त्र मन्त्रीमण्डल गठन, सांसदको भूमिमा विधायकी मात्र, राष्ट्रिय जीवनका महत्त्वपूर्ण सवालमा जनमत सङ्ग्रह, निर्वाचनमा राइट टु रिजेक्ट र राइट टु रिकलको व्यवस्था र आर्थिक पारदर्शिता सङ्कल्पका रूपमा अघि सारेको छ।