सहकारीका कर्मचारीलाई गोली हान्ने चारजना पक्राउ

काठमाडौं– सर्लाहीको लालवन्दी नगरपालिका–२ जुट पानीको सगुन बचत तथा ऋण सहकारी संस्थाका कर्मचारीलाई गोली हानेको आरोपमा चार जनालाई प्रहरीले पक्राउ गरेको छ। पक्राउ पर्नेमा तीन जना भारतीय र एक जना नेपाली रहेको प्रहरीले जानकारी दिएको छ। उनीहरुलाई सर्लाहीको बलरास्थित नेपाल–भारत सीमाबाट पक्राउ गरिएको हो।

पक्राउ पर्नेमा भारतको बिहार राज्य अन्तर्गत शिवहर जिल्ला छपरा निवासी रेहान भनिने आलोक सिंह, बिहारको बैशाली जिल्ला सुल्तानपुर बस्ने शौरभ यादव, बिहारकै मोतिहारी जिल्ला सिगारगञ्ज बस्ने गुलसन कुमार सिंह र सर्लाहीको धनकौल गाउँपालिका–१ बस्ने ३२ वर्षीय डिजे भनिने धिरेन्द्र सहनी रहेको प्रहरीले जानकारी दिएको छ। भारतीय नागरिक १९ वर्षिय रहेका छन्। 

बुधबार (हिजो) बिहान तीन जना एउटै मोटरसाइकलमा आएर सगुन सहकारीका कर्मचारी ३० वर्षिय साजन कार्कीमाथि गोली प्रहार गरी रित्तो झोला लिएर भागेका थिए। उनको अहिले काठमाडौमा उपचार भइरहेको छ। कार्कीको दायाँ पाखुरा, दायाँ कोखा, बायाँ कोखा र दायाँ तिघ्रामा गोली लागेको छ।