पोखरा- नवौँ राष्ट्रिय खेलकुदअन्तर्गत एथ्लेटिक्स डिस्क थ्रो इभेन्टमा त्रिभुवन आर्मी क्लब र लुम्बिनी प्रदेशले स्वर्ण पदक जितेका छन्। सोमबार भएका स्पर्धामा इभेन्टको पुरुषतर्फ आर्मीका चित्रबहादुर वली र लुम्बिनीका संगीता अधिकारीले स्वर्ण पदक जितेका हुन्।
वलीले फालेको डिस्क सबैभन्दा धेरै ३८.४८ मिटर पर पुगेपछि उनले स्वर्ण पदक जितेका हुन्। त्यस्तै अधिकारीले फालेको डिस्क ३५.१० मिटर पर पुगेको थियो। पुरुषतर्फ नेपाल पुलिसका पुस्कल खड्काले रजत र सुदूरपश्चिम प्रदेशका हेमन्त पालले काँस्य पदक जिते। खड्काले ३१.७५ मिटर र पालले ३१.१० मिटर टाढासम्म प्रहार गरे।
महिलातर्फ सशस्त्र प्रहरी बल एपीएफकी जीतकुमारी महतोले रजत जितिन्। उनले ३३.६० मिटर थ्रो गरिन्। त्रिभुवन आर्मी क्लबकी मिलन बुढामगरले ३२.३५ मिटर थ्रो गर्दै काँस्य पदक जितिन्।