मोरङमा मतदाता शिक्षा कार्यक्रम प्रभावकारी बनाइने

विराटनगर- आगामी मंसिर ४ गते हुने प्रदेश र प्रतिनिधिसभा सदस्य निर्वाचनका लागि मोरङमा मतदाता शिक्षा कार्यक्रम प्रभावकारी बनाइने भएको छ। 

मतदाता शिक्षा जिल्ला स्तरिय समिति मोरङले निर्वाचन आयोगले समय निर्धारण गरेपछि कार्यक्रम शुरु गर्ने गरि आईतबार तयारी बैठक बसेको छ। मोरङका प्रमुख जिल्ला अधिकारी काशीराज दाहालको अध्यक्षमा बसेको बैठकमा मुख्य निर्वाचन अधिकृत, प्रहरी प्रमुख, स्थानीय तहका प्रमुख प्रशासकीय अधिकृतहरु, जिल्ला समन्वय समितिको सहभागिता रहेको थियो। 

बैठकले स्थानीय तह निर्वाचनमा मतदाता शिक्षा कार्यक्रम सञ्चालन नहुँदा मत बदर बढेकाले मंसिर ४ गते हुने निर्वाचनका लागि मतदाता शिक्षा कार्यक्रमलाई प्रभावकारी रुपमा सञ्चालन गरिने निर्णय गरेको छ। 

बैठकमा प्रमुख जिल्ला अधिकारी दाहालले निश्पक्ष, भयरहित र स्वतन्त्र रुपमा निर्वाचन सम्पन्न गर्नका लागि आचारसंहिता पालनामा बढी केन्द्रीत हुन प्रमुख प्रशासकीय अधिकृतहरूलाई आग्रह गरे। उनले भने, ‘कात्तिक १७ गतेदेखि मात्रै आमसभा, घरदैलो लगायतका प्रचार प्रसारका कार्यक्रम गर्न पाईने आचार संहितामा उल्लेख भएकाले सोही अनुसार अनुगमनको कार्य गर्नुहोला।’ 

मतदान स्थलको व्यवस्थापन र सरसफाई लगायतका कार्यक्रमा पनि सहयोग गर्न उनले आग्रह गरे। स्थानीय तहमा बार्षिक स्वीकृत कार्यक्रम बाहेक अन्य कार्यक्रम सञ्चालन भए रोक्नुपर्ने उनले बताए। प्रमुख जिल्ला अधिकारी दाहालले मतगणना स्थलका लागि पनि निर्वाचन अधिकृतसँग समन्वय गरि व्यवस्थापनमा सहयोग गर्न आग्रह गरे। 

प्रदेश निर्वाचन कार्यालयका प्रमुख लेवन कश्यप अधिकारीले मतदाता शिक्षालाई प्रभावकारी बनाउन सञ्चार माध्यमका साथै विभिन्न अभियानमार्फत कार्यक्रमहरु सञ्चालन गरिने बताए। उनले भने, ‘निर्वाचनमा सहभागी हुन्छ’ लगायतका अभियानहरु सञ्चालन गरिने छ।’ 

मतदाता शिक्षा कार्यक्रम सञ्चालनका लागि प्रमुख प्रशासकीय अधिकृतको नेतृत्वमा पालिका स्तरिय र वडा सचिवको नेतृत्वमा वडा स्तरिय समिति गठन गरिएको छ। पालिका र वडा स्तरिय समितिलाई निर्वाचन कार्यालयले मतदाता शिक्षा सामाग्री उपलब्ध गराउने प्रदेश निर्वाचन कार्यालयका प्रमुख अधिकारीले जानकारी दिए।