भक्तपुरमा ट्याक्सी र मोटरसाइकल ठोक्किँदा एक जनाको मृत्यु

काठमाडौं- भक्तपुरको बाहाखा बजारमा ट्याक्सी र मोटरसाइकल ठोक्किँदा मोटरसाइकल चालकको ज्यान गएको छ।

शनिबार राति करिब साढे १० बजे भएको दुर्घटनामा गम्भीर घाइते भएका मोटर साइकल चालक नुवाकोट घर भई काठमाडौं कपन बस्ने ३१ वर्षीय दीपेन्द्र पण्डितको उपचारको क्रममा मृत्यु भएको हो।

प्रहरीका अनुसार मध्यपुरठिमी नगरपालिका-६ को भीमसेन चोकमा सानोठिमीबाट निकोसेरातर्फ आउँदै गरेको बा१ज ९०६० नम्बरको ट्याक्सी र विपरीत दिशातर्फ गइरहेको बा८३प ५४४८ नम्बरको मोटरसाइकल आपसमा ठोक्किँएका थिए।

घाइते भएका पण्डितलाई कोरियन अस्पताल ठिमीमा प्रारम्भिक उपचार गरी थप उपचारका लागि अन्नपूर्ण न्यूरो अस्पताल माइतीघर पुर्‍याइएको थियो। उनको उपचारका क्रममा बिहान करिब ६ बजे मृत्यु भएको महानगरीय प्रहरी कार्यालय भक्तपुरका प्रहरी नायब उपरीक्षक राजु पाण्डेले जानकारी दिए।

ट्याक्सी चालक सुन्दर गोर्खालीलाई प्रहरीले नियन्त्रणमा लिएको जनाएको छ।