मतपत्र ढुवानीमा जुट्यो आयोग

काठमाडौं– निर्वाचन आयोगले आगामी ४ मंसिरमा हुने प्रतिनिधिसभा र प्रदेशसभा सदस्य निर्वाचनका लागि समानुपातिक निर्वाचन प्रणालीतर्फको छपाइ भएको मतपत्र प्रदेश १ र मधेस प्रदेशबाट ढुवानी थालेको छ।

समानुपातिक निर्वाचन प्रणालीतर्फको प्रतिनिधिसभा र प्रदेशसभा निर्वाचनका लागि हालसम्म खोटाङ, ओखलढुंगा, सोलुखुम्बु, उदयपुर, सप्तरी, महोत्तरी, धनुषा, सिरहा, ताप्लेजुङ, पाँचथर, इलाम, झापा, सङ्खुवासभा, तेह्रथुम, भोजपुर, धनकुटा, मोरङ र सुनसरीमा उक्त मतपत्र ढुवानी भएको आयोगले बताएको छ।

उक्त प्रणालीका लागि ४ करोड ६ लाख ५ हजार मतपत्रको छपाइ सम्पन्न भएको थियो। प्रतिनिधिसभातर्फको समानुपातिक प्रणालीका लागि २ करोड ४ लाख २१ हजार मतपत्रको छपाइ सम्पन्न भएको भने सात वटै प्रदेशका लागि समानुपातिकतर्फ २ करोड १ लाख ८४ हजार मतपत्र छपाइ सम्पन्न भएको छ।

पहिलो हुने निर्वाचित हुने प्रणालीका लागि १७ लाख मतपत्र छपाइ भएको आयोगले जनाएको छ। भक्तपुरस्थित जनक शिक्षा सामग्री केन्दमामा उच्च सुरक्षासहित मतपत्र छपाइ भइरहेको हो।