महिला हक्कीमा आर्मी विजयी

पोखरा– नवौं राष्ट्रिय खेलकुदको महिला हक्की विधाअन्तर्गत शनिबार भएको खेलमा आर्मी विजयी भएको छ। खेलमा आर्मीले ८–० को गोल अन्तरले वागमतीलाई हराएको हो।

खेलको पहिलो क्वाटरमा आर्मीकी सुनिता नेगीले गोल गर्न सफल भएकी थिइन्। खेलको पहिलो मिनेटमै सुनिताले गोल गरेकी थिइन्। त्यस्तै खेलको १४ औं मिनेटमा आर्मीका सीतामाया बलले गोल गरिन्।

खेलको दोस्रो क्वाटरमा आर्मीले लगातार तीन गोल गर्न सफल भएको थियो। खेलको २७ औं मिनेटमा सरस्वती तामाङ, २८ मिनेटमा सीता कुमारी चौधरी र २९  मिनेटमा डम्बरा भट्टले गोल गरेका थिए।

खेलको तेस्रो क्वाटरमा सुनिताले आर्मीको लागि एक गोल गर्न सफल भएकी थिइन्। ४० मिनेटमा सुनिताले गोल गर्दै आर्मीको लागि अंक बढाएकी छन्।

यस्तै अन्तिम क्वाटरमा आर्मीले दुई गोल गर्दै ८–० को गोल अन्तरले विजय भयो। ४८ मिनेटमा सरस्वती तामाङ र ५४ मिनेटमा कमला चन्दले एक–एक गोल गरेका थिए। अब  दोस्रो खेल सुदूरपश्चिम र मधेस प्रदेशबीच हुँदैछ।