मर्चवारीबाट बालिका बेपत्ता, अपहरणको आशंका

बुटवल- रुपन्देहीको मर्चवारी गाउँपालिकाबाट एक बालिका बेपत्ता भएकी छन्। मर्चवारी गाउँपालिका वडा नम्ब १ का सोनु विश्वकर्मा र पूजा विश्वकर्माको छोरी ६ वर्षिया प्रिति विश्वकर्माको बिहीबार दिँउसो अज्ञात समूहले अपहरण गरेको परिवारले बताएका छन्।  

डाइरेक्सन इंगलिश बोर्डिङ स्कूल समेराबाट ७ वर्षिय दाजु रितेश विश्वकर्मासँग घरतर्फ फर्कंदै गर्दा मोटरसाइकलमा आएका २ जनाले अपहरण गरेको बुबा सोनु विश्वकर्माले बताए। कक्षा नर्सरीमा अध्ययन गर्ने बालिकाको अपहरण भएपछि परिवारले इलाका प्रहरी कार्यालय मर्चवारमा उजुरी दिएका छन्। 

घर फर्कंदै गरेकी बालिकालाई मोटरसाइकलमा नचिनेको समूहले समातेर लैजान खोज्दा रितेशले प्रतिवाद गर्दा हातमा अपहरणकारीले चोट पुर्याएको सियारी गाउँपालिकाका अध्यक्ष थानेश्वर घिमिरेले बताए। इलाका प्रहरी कार्यालय मर्चवारले बालिकाको खोजी कार्य भइरहेको जानकारी दिएको छ।