काठमाडौं– एमाले रौतहट जिल्ला कमिटी विघटन भएको छ। एमाले मधेस प्रदेश कमिटीले शुक्रबार रौतहट जिल्ला कमिटी विघटन गरेको हो।
प्रदेश कमिटी अध्यक्ष रामऔतार यादवले जिल्ला उपाध्यक्ष दीपक राय यादवलाई पत्र पठाउँदै त्रिभुवन साह अध्यक्ष रहेको जिल्ला कमिटी विघटन गरिएको जानकारी दिएका छन्। अध्यक्ष साहलगायत जिल्ला कमिटीका सदस्यहरू पार्टीविरोधी गतिविधिमा लागेकोले जिल्ला कमिटी विघटन गरिएको प्रदेश कमिटीले जनाएको छ।
एमाले रौतहटका प्रभावशाली नेता प्रभु साहले स्वतन्त्र उम्मेदवारी दिएपछि जिल्ला कमिटी विघटन गरिएको हो। साहले रौतहट क्षेत्र नम्बर ३ मा स्वतन्त्र उम्मेदवारी दिएका छन्। उनीनिकट केही एमाले नेताले समेत मधेशका केही क्षेत्रमा प्रतिनिधिसभा र प्रदेशसभामा स्वतन्त्र उम्मेदवारी दिएका छन्। एमालेबाट विद्रोह गरेका साहलाई सत्ता गठबन्धनले समर्थन गर्ने निर्णय गरेको छ।