होम डेलिभरी गरिएको चिकन चिल्लीमा साङ्ला

विराटनगर- विराटनगर १ की कविता बरालले होम डेलिभरीमार्फत् खरिद गरेको चिकन चिल्लीमा साङ्‌ला फेला परेको छ। 

विराटनगर ४ कञ्‍चनबारीमा रहेको शुभ ब्याङ्‌वेट एण्ड रेष्टुरेन्टले तयार गरेको चिकन चिल्ली क्‍विकर फुडमार्फत् बरालले खरिद गरेकी थिइन्। चिकन चिल्ली प्याक खोलेर खानेक्रममा साङ्ला भेटिएपछि विराटनगर महानगरपालिकामा उनले उजुरी गरिन्। 

बरालको उजुरीका आधारमा महानगरको आर्थिक विभाग महाशाखा प्रमुख दिपक पौडेलको नेतृत्वमा गरिएको निरीक्षण टोली रेष्टुरेन्ट पुगी अनुगमन गरेको थियो। अनुगमनका क्रममा रेष्टुरेन्टमा रहेको फ्रिजमा राखिएका खानेकुराहरुमा ढुसी परेको, प्लाष्टिकमा प्याक गरी खाना राखिएको, म्याद गुज्रिएका पिज्जालगायतका खाद्य सामग्रीहरु फेला पारेको थियो। 

म्याद गुज्रिएका सबै खाद्य वस्तुहरु नष्ट गरिएको छ। निरीक्षण टोलीले म्याद गुज्रिएका खाद्य सामग्रीहरु आगामी दिनमा नराख्‍न र फ्रिजको सरसफाई गर्न निर्देशन दिएको छ। सरसफाईमा ध्यान दिने र सुधार गर्ने शर्तमा पहिलो पटकका लागि नसियत दिइएको बताइएको छ। 

निरीक्षण टोलीले विराटनगर ५ मा रहेको कंकालिनी जनरल स्टोरमा पनि अनुगमन गरेको छ। अनुगनमका क्रममा खाद्य सामग्री तथा पेय पदार्थहरु म्याद गुज्रिएको पाइएको थियो। म्याद गुज्रिएका सामग्रीहरुको लगत संकलन गरी नष्ट गरिएको निरीक्षण टोलीले जनाएको छ।