सिभिल अस्पतालमा कार्यरत डा. पाठकद्वारा आत्महत्या

काठमाडौं- सिभिल अस्पताल नयाँ बानेश्वरमा कार्यरत चिकित्सक सुस्मिता पाठकले बुधबार आत्महत्या गरेकी छन्।

बिरामीको शल्यक्रिया गर्दा प्रयोग हुने नशालु पदार्थ आफैँले सिरिन्जबाट प्रयोग गरी डा. पाठकले आत्महत्या गरेको प्रहरीले जनाएको छ।

ललितपुरको इमाडोलमा बस्दै आएकी डा. पाठकले प्रेममा असफल भएपछि आत्महत्या गरेको आशंका गरिएको प्रहरीले जनाएको छ। 

उनी बुधबार दिउँसोसम्म पनि कोठाबाट बाहिर ननिस्कएपछि छिमेकीले प्रहरीलाई खबर गरेका थिए। प्रहरीले डा. पाठक बस्दै आएको कोठा फोडेर हेर्दा उनलाई मृत अवस्थामा फेला पारेको हो।

जनकपुर घर भई उक्त अस्पतालमा कार्यरत पाठकले सुसाइट नोटसमेत लेखेर आत्महत्या गरेको ललितपुर प्रहरीले जनाएको छ। प्रहरीले मोबाइलमा फेला पारेको भिडियोमा पाठकले बेहोस हुने औषधि अत्यधिक स्प्रे गरेको देखिएको बताएको छ। प्रहरीले घटनाका बारेमा अनुसन्धान थालेको जनाएको छ।