इन्डोनेसियाको रंगशालामा भएको दंगामा १२९ जनाको मृत्यु

जार्कता- इन्डोनेसियाको पूर्वी जाभास्थित फुटबल रंगशालामा भएको दंगामा परी १२९ जनाको मृत्यु भएको छ। पर्सीबाया सुरबायासँग अरिमा फुटबल क्लबले ३–२ ले खेल हारेपछि समर्थकहरु मैदानमा उत्रिएर दंगा सुरु गरेका थिए। खेल सकिएपछि मैदानमा छिरेका उनीहरुलाई सम्हाल्न प्रहरीले अश्रुग्यास प्रहार गरेको थियो।

सोही क्रममा भागदौड हुँदा कम्तीमा १२९ जनाको मृत्यु भएको बीबीसीले जनाएको छ। घटनामा करिब १८० जनाभन्दा बढी घाइते भएका छन्।

सामाजिक सञ्जालहरुमा सार्वजनिक भएका भिडियोहरुमा खेल सकिएको जनाउमा सिटी बजिसकेपछि समर्थकहरु पिचमा दौडिएका हुन्। उनीहरुलाई रोक्न प्रहरीले  प्रहार गरेको अश्रुग्यासबाट निसासिएका उनीहरुबीच भागदौड सुरु भएको थियो। 

पूर्वी जाभाका प्रहरी प्रमुख निको अफिन्ताका अनुसार घटनामा दुई जना प्रहरीको पनि मृत्यु भएको छ। ‘३४ जनाको रंगशालाभित्रै मृत्यु भएको हो। अरुको उपचारका क्रममा अस्पतालमा मृत्यु भयो,’ उनले भने। उनका अनुसार रंगशालामा अक्सिजनको कमि भएका कारण उनीहरुको मृत्यु भएको हो।

विश्‍वको फुटबल नियामक निकाय फिफाले भने भिड नियन्त्रण गर्ने प्रहरी अथवा सुरक्षाकर्मीले मैदानमा अश्रुग्यास बोक्‍ने नहुने बताएको छ। इन्डोनेसिया फुटबल एसोसियसनले घटनाको अनुसन्धान सुरु गरेको बताएको छ। 

इन्डोनेसियाको फुटबलमा हिंसा हुने हुँदा पर्सीबाया सुरबायाको समर्थकहरुलाई भने टिकटमा नै रोक लगाइएको थियो। यद्पि उक्त रंगशालामा ३८ हजारको सिट क्षमता भए पनि ४२ हजार हजार टिकट बिक्री भएको बताइएको छ। 

राष्ट्रपति विडोडोले मुलुककै 'दुखान्त फुटबल' भएको बताएका छन्। सन् १९६४ मा लिमामा भएको पेरु र अर्जेन्टिनाको ओलम्पिक क्‍वालिफायरमा भएको दंगाका क्रममा ३२० जनाको मृत्यु भएको थियो भने सन् १९८९ मा बेलयातमा भएको दंगामा ९७ जनाको मृत्यु भएको थियो।