कामु प्रधानन्यायाधीश कार्कीको असोज १६ मा अवकाश, पूर्वप्रधानन्यायाधीश सरह सुविधा दिइने

काठमाडौं- कायममुकायम प्रधानन्यायाधीश दीपककुमार कार्कीको यही असोज १६ गते अनिवार्य अवकाश पाउने भएका छन्। ६५ वर्षको उमेर हदका कारण असोज १६ मा कार्कीले अवकाश पाउने भएपछि सरकारले उनको सेवा सुविधाबारे निर्णय गरेको छ। 

सरकारले कामू प्रधानन्यायाधीश दीपककुमार कार्कीलाई अवकाशपछि पूर्वप्रधानन्यायाधीशलाई सरह सुविधा दिने निर्णय गरेको छ। हालै बसेको मन्त्रिपरिषद बैठकले ६ महिनाभन्दा बढी अवधि कामू प्रधानन्यायाधीश भएका न्यायाधीशलाई गाडी र सवारीचालकको सुविधा दिने निर्णय गरेको हो।

प्रधानन्यायाधीश चोलेन्द्रशमशेर जबराविरुद्ध १ फागुन २०७८ मा महाअभियोग प्रस्तावका कारण उनी निलम्बनमा परेपछि कार्की कामू प्रधानन्यायाधीश भएका थिए। उनको अवकाशअघि बसेको मन्त्रिपरिषद बैठकले ६ महिना कामु प्रधानन्यायाधीश भइसकेका न्यायाधीशलाई गाडी र सवारीचालक सुविधा दिने निर्णय गरेको हो ।

पूर्व प्रधानन्यायाधीशले गाडी, केही सुरक्षाकर्मी र सहयोगी कर्मचारी सुविधा लिने गरेका छन्। सुरक्षाकर्मी र सहयोगी भने निश्चित अवधिपछि फिर्ता गर्नुपर्छ।