चालू आवको पहिलो दुई महिनामा घट्यो नेपालको आयात–निर्यात व्यापार

काठमाडौं– चालू आर्थिक वर्षको पहिलो दुई महिनामा नेपालको अन्तर्राष्ट्रिय व्यापार घटेको विवरण भन्सार विभागले सार्वजनिक गरेको छ। विभागले सार्वजनिक गरेको चालू आर्थिक वर्षको दुई महिना (साउन–भदौ)सम्मको तथ्यांकअनुसार नेपालले कुल ३ खर्ब दुई अर्ब २८ करोड रुपैयाँको अन्तर्राष्ट्रिय व्यापार गरेको छ। 

यो गत आर्थिक वर्षको सोही अवधिको तुलनामा १५.७० प्रतिशत कम हो। गत वर्षको भदौसम्म कुल अन्तर्राष्ट्रिय व्यापार ३ खर्ब ५८ अर्ब ५५ करोड थियो। 

विभागका अनुसार भदौसम्म आयात र निर्यात दुवै घटेको छ। अघिल्लो आर्थिक वर्षको पहिलो दुई महिनाको तुलनामा आव २०७९/८० को सोही अवधिमा कुल आयात १३ प्रतिशत घटेर २ खर्ब ७३ अर्ब ५९ करोड पुगेको छ। सोही अवधिमा निर्यात करिब ३५ प्रतिशतले घटेर २८ अर्ब ६८ करोड रुपैयाँमा सीमित भएको छ। 

आयात र निर्यात दुवै घट्दा व्यापार घाटा भने सामान्य घटेको विभागको तथ्यांकले देखाउँछ। अघिल्लो आर्थिक वर्षको भदौसम्मको तुलनामा चालू आर्थिक वर्षको सोही अवधिमा व्यापार घाटा ९.४५ प्रतिशतले घटेर २ खर्ब ४४ अर्ब ९१ करोड भएको छ। 

नेपालले भदौसम्म धेरै आयात गरेका वस्तुमध्ये पेट्रोलियम पदार्थ शीर्ष स्थानमा छ । साउन–भदौमा नेपालले १८ अर्ब ४२ करोडको डिजेल आयात गरेको छ भने १२ अर्ब १८ करोडको पेट्रोल र १० अर्ब ४२ करोड रुपैयाँको एलपी ग्यास आयात गरेको छ।  

यसैगरी सोही अवधिमा ९ अर्ब ८ करोड रुर्पयाँको कच्चा भटमास तेल र ७ अर्ब २७ करोडको फलामजन्य उत्पादनको आयात भएको छ।निर्यात भएका प्रमुख वस्तुको सूचीमा पाम तेल, गलैंचा, भटमास तेल, फेल्ट र कालो चिया छन्। 

यसै अवधिमा नेपालले भारतबाट १ खर्ब ६९ अर्ब ६५ करोड रुपैयाँको वस्तु आयात गरेको छ भने १९ अर्ब ८३ करोडको वस्तु निर्यात गरेको छ। दोस्रो स्थानमा रहेको चीनबाट ३७ अर्ब १२ करोड रुपैयाँको वस्तु आयात गर्दा १२ करोड ३९ लाखको मात्र निर्यात भएको छ।