अफगानी आतंकवादी समूहहरूका नाइके रहेनन्

काबुल- अफगानिस्तानको आतंकवादी संगठन हक्कानी नेटवर्कका संस्थापक जलालुद्दिन हक्कानीको लामो बिरामीपछि मृत्यु भएको छ ।

उनी आतंकवादी संगठनहरू तालिबान र अल–कायदा दुवैका प्रिय पात्र मानिन्थे । हक्कानीका छोराले सन् २००१ देखि नै नेटवर्क कब्जामा लिएको विश्वास गरिन्छ । पछिल्ला दिनमा अफगानिस्तानमा स्वदेशी तथा नेटो फोर्समाथि भइरहेका आक्रमणहरूमा हक्कानी नेटवर्कको हात रहेको बताइँदै आएको छ ।

जलालुद्दिनले सन् १९८० मा सोभियत संघको सेनाविरुद्ध गुरिल्ला युद्ध छेडेका थिए । त्यतिबेला अफगानिस्तान सोभियत संघको कब्जामा थियो । त्यतिबेला उनी अमेरिकी जासुसी संस्था सीआईएका विश्वास पात्रका रूपमा चर्चामा थिए ।

पछि उनी तालिबानका मित्रका रूपमा देखा परे । सन् १९९६ मा अफगानिस्तानमा तालिबानको कब्जा हुँदा उनी त्यसको समर्थक देखिए । उनको मृत्यु घोषणा गर्दै तालिबानले जलालुद्दिनलाई ‘अनुकरणीय योद्धा र यस युगका प्रतिष्ठित जिहादी व्यक्तित्व’ संज्ञा दिएको छ ।

अफगानिस्तानका आदिवासी इलाकाहरूमा सक्रिय धेरै सशस्त्र समूहमध्ये हक्कानी नेटवर्क पनि एक हो । र, यसलाई पाकिस्तानी भूमिबाट सञ्चालित भएको आरोप लाग्दै आएको छ । सन् २०१७ मा काबुलमा भएको आत्मघाति आक्रमणमा पनि सोही नेटवर्कको हात थियो, जसमा परी एकसाथ डेढ सय सर्वसाधारणको ज्यान गएको थियो ।