तौल घटाउन जिम थालेकी थिएँ, स्ट्रेन्थलिफ्टिङमा स्वर्ण जितेँ : दीपा विष्ट [कुराकानी]

स्ट्रेन्थलिफ्टिङ नयाँ खेल हो। सन् २००४ मा भारतको कलकत्ताबाट सुरु भएको यो खेल विस्तारकै क्रममा छ। १४ देशसम्म पुगिसकेको खेलमा पछिल्लो पटक क्यानडा जोडिएको छ।

नेपालमा औपचारिक रुपमा स्ट्रेन्थलिफ्टिङ खेल शुरु भएको एक वर्ष भयो। सन् २०२१ बाट औपचारिक रूपमा खेल्न सुरु गरिएको हो। नेपालमा यसको आफ्नो संघ छैन। 

स्ट्रेन्थलिफ्टिङको संघ बनाउन अहिले जिल्ला समितिहरू गठन भइरहेका छन्। ७७ वटै जिल्ला समिति बनेपछि मात्रै राष्ट्रिय खेलकुद परिषद् र ओलम्पिक कमिटीमा आबद्ध हुन सकिने व्यवस्था छ। औपचारिक रुपमा खेल्न शुरु गरेको एक वर्ष भित्रमै अन्तर्राष्ट्रिय रुपमा नेपाली खेलाडी मोरङ सुन्दरहरैँचा ११ की २६ वर्षीया दीपा विष्टले स्वर्ण पदक हात पारेकी छिन्। 

भदौ २० देखि २८ गतेसम्म किर्गिस्तानमा आयोजित विश्व प्रतियोगितामा सहभागी १४ देशका खेलाडीलाई उनले पराजित गरिन्। ७२ केजीमाथिको तौलमा भारत र पाकिस्तानका खेलाडीले विष्टलाई चुनौती दिएका थिए। तर, त्यस चुनौतीलाई सहज ढंगले पन्छाउँदै उनले स्वर्ण पदक जित्न सफल भइन्। उनै दीपा विष्टसँग नेपाल समयका नेत्र पी अधिकारीले गरेको कुराकानी: 

जिममा हेभी लिफ्ट गर्न मन लाग्यो। बडी बिल्डिङको ट्रेनिङ सुरु गरेँ। त्यसपछि स्ट्रेन्थलिफ्टिङको पनि ट्रेनिङ गरेँ। मैले पावर लिफ्टिङको ट्रेनिङ पहिले नै गरेकी थिएँ। स्ट्रेन्थलिफ्टिङको ट्रेनिङ एक महिना गरेलगत्तै झापामा गेम हुने भयो। प्रदेशस्तरीय प्रतियोगितामा मैले पनि भाग लिएँ।