आचारसंहितामा हस्ताक्षर गर्न प्रधानमन्त्रीसहितका नेता बोलाउँदै आयोग

काठमाडौं– निर्वाचन आयोगले आगामी ४ मंसिरमा हुने प्रदेशसभा तथा प्रतिनिधिसभा चुनावका लागि निर्वाचन आचारसंहिता कार्यान्वयनमा लैजाने भएको छ। आयोगले प्रधानमन्त्री शेरबहादुर देउवासहित प्रमुख राजनीतिक दलका नेताहरूलाई आगामी आइतबार आचारसंहितामा हस्ताक्षर गर्न बोलाउने भएको छ। 

‘निर्वाचन आचारसंहिता लागू गर्नेबारे छलफल र प्रतिबद्धता जनाउन प्रधानमन्त्री र गृहमन्त्रीसँग आयोगले छलफल गर्दै छ। उहाँहरूलगायत अन्य पार्टीका नेतासँगको छलफलपछि आयोगले निर्णय गर्छ। सम्भवतः आइतबार प्रधानमन्त्रीको समय मिल्यो भने सोहीअनुसार अन्य दलका नेताहरूलाई पनि बोलाएर प्रतिबद्धता–पत्रमा हस्ताक्षर गरेर आचारसंहिता लागू भएको घोषणा गरिन्छ,’ आयोगले भनेको छ।

निर्वाचनको मतदान मिति ५८ दिन बाँकी छ। आयोगका प्रवक्ता शालिग्राम पौडेलले निर्वाचन आचारसंहिता राजपत्रमा प्रकाशित भए पनि लागू हुन आयोगले निर्णय गर्नुपर्ने बताए। उनले भने, ‘आयोगले अहिलेसम्म आचारसंहिता लागू हुने मिति घोषणा गरिसकेको छैन।’

विगतमा निर्वाचन आचारसंहिता लागू हुनेबारे एकरूपता भएको पाइँदैन। ‘विगतमा कहिले एक महिनाअघि, कहिले दुई महिनाअघि र कहिले निर्वाचन घोषणा भएकै मितिदेखि पनि लागू भएको उदाहरण छ’, प्रवक्ता पौडेलले भने।