के  छापे आजका दैनिक अखबारहरुले ? 

काठमाडौं- राजधानीबाट प्रकाशित मंगलबारका राष्ट्रिय दैनिक अखबारहरुले विविध विषयका खबरलाई पहिलो प्राथमिकतामा पारेका छन् । 

कसैले नेकपाको एकतामा भद्रगोल भएको विषयलाई मुख्य समाचार बनाएका छन् भने कसैले पप्पु कन्ट्रक्सनको नालीबेलि छापेका छन् । आजको अन्नपूर्ण पोस्ट्ले शीर्ष नेतालाई नै भागबन्डा चित्त नबुझ्दा नेकपा एकतामा भद्रगोल देखिएको विषयलाई मुख्य समाचार बनाएको छ । 

केन्द्रिय कार्यालयको आन्तरिक सर्कुलरअनुसार भदौ दोस्रो सातासम्म प्रदेश तथा जिल्ला कमिटी र जनसंगठनको एकता भइसकेर पहिलो बैठक बसिसक्नु पथ्र्यो । तर, मुख्य नेताकै जोड घटाउ नमिल्दा एकता प्रक्रिया लम्बिएको अन्नपूर्णले लेखेको छ । 

यसैगरि अन्नपूर्णले कसरी भित्रियो चिनियाँ जहाज ? शीर्षकमा अर्को मुख्य खबर लेखेको छ । चिनियाँ जहाजबाट बार्षिक ३५ करोड नोक्सानी भएको, मूल्य तीन करोड ५० लाख अमेरिकी डलर भएपनि दोब्बर मूल्यमा खरिद गरेको, खरिद प्रक्रियामा पाँच पदाधिकारी संलग्न भएको समाचारमा जनाइएको छ । 

पप्पुलाई साढे ५ अर्बको पुल मात्रै शीर्षकमा मुख्य समाचार छापेको कान्तिपुरले पप्पु कन्स्ट्रकसनले अलपत्र पारेको पुलको सूची सार्वजनिक गरेको छ । ठेक्का लिने र काम अलपत्र पारेको विषयमा भौतिक पूर्वाधार तथा यातायात मन्त्रालयले आन्तरिक छानबिन समेत सुरु गरेको समााचारमा उल्लेख छ । यस्तै कान्तिपुरले सरकारसंग तीन बुँदे सहमती भएपछि चिकित्सकहरुले आन्दोलन रोकेको खबर पनि महत्वका साथ पहिलो पृष्ठमा छापेको छ ।  

नागरिक दैनिकले भने राहदानीमा जिल्ला र राष्ट्रियता नै फरक पर्ने गरि गम्भिर लापरबाही गरेको खबर लेखको छ । मुक्तिकला लामिछानेको राहदानीमा धादिङको बासिन्दालाई डोटी र नेपालीको राष्ट्रियता तिब्बतियन बनाएको पाइएको छ । यस्तै खनिजमा माफिया तन्त्र मौलाएको र कब्जा गर्ने होड चलेको खबरलाई विशेष महत्वका साथ नागरिकले छापेको छ । 

आजको नयाँ पत्रिका दैनिकले त्रिवि अध्यापककै प्रश्नपत्र किनबेच शीर्षकमा मुख्य समाचार छापेको छ । उसका अनुसार उपप्राध्यापकको परिक्षामा एमएका टपरलाई लेख्न लगाइयो, प्रश्नपत्रको किनबेचपछि सतर्कता केन्द्रले हस्तक्षेप गरेको छ । सेवा आयोगमा चरम बेथिती रहेको भन्दै विज्ञहरुले नै सेवा आयोग खारेज गर्नुपर्नेमा जोड दिन थालेको समाचारमा उल्लेख छ । 

आजको कारोबार दैनिकले भने दशैँका लागि काठमाडौं उपत्यकामा ७० हजार खसीबोका ल्याउने तयारी भएको विषयलाई मुख्य समाचार बनाएको छ ।