कपनमा आगलागी अपडेट : मृतक तीनै जनाको सनाखत

काठमाडौं- काठमाडौंको कपनमा भएको आगलागीमा ज्यान गुमाएका तीन जनाको पहिचान खुलेको छ।

ज्यान गुमाउनेमा ताप्लेजुङ घर भएका २७ वर्षीय कासाङ तेञ्जी शेर्पा, सङ्खुवासभा घर भइ सुकेधारा बस्ने अशोक राई र काठमाडौं महानगरपालिका वडा नम्बर २६ रानीबारी बस्ने २५ वर्षीय छेवाङ शेर्पा रहेका छन्।

ज्यान गुमाएकाको शव शिक्षण अस्पताल महाराजगञ्जमा राखिएको प्रहरीले जनाएको छ। आगलागीमा एक जना घाइते भएका छन्। घाइतेको उद्धार गरी चुनिखेलमा रहेको करुणा अस्पतालमा उपचार भइरहेको प्रहरीको भनाइ छ।

बुढानीलकण्ठ नगरपालिका-११ कपनमा बुधबार बेलुका आगलागी भएको थियो। आगो गएराति नै लियन्त्रणमा लिइएको थियो।

आगो निभाउन  बौद्ध रामहिटी, ललितपुर महानगरपालिका, भक्तपुर नगरपालिका, नेपाली सेना, नेपाल प्रहरी, सशस्त्र प्रहरी, त्रिभुवन विमानस्थलबाट एक/एक तथा काठमाण्डौ महानगरपालिकाबाट दुई गरी ९ वटा दमकल प्रयोग गरिएको थियो। यस्तै, १० वटा पानी ट्याङ्कर परिचालन गरिएका थिए।