अस्थायी मतदाता नामावली संकलन तालिका प्रकाशन

काठमाडौं– निर्वाचन आयोगले अस्थायी मतदाता नामावली संकलन तालिका प्रकाशन गरेको छ। आगामी ४ मंसिरमा हुने प्रतिनिधिसभा र प्रदेशसभा निर्वाचनका लागि समानुपातिक निर्वाचन प्रणालीअन्तर्गत निर्वाचन प्रयोजनका लागि अस्थायी मतदाता नामावली संकलन सुरु भएको हो।

६ देखि ८ असोजसम्म अस्थायी मतदाता नामावली संकलन हुने आयोगले बताएको छ। आयोगका अनुसार नेपाल सरकार, प्रदेश सरकार, स्थानीय तह तथा नेपाल सरकार वा प्रदेश सरकारको स्वामित्व वा नियन्त्रणमा रहेको संस्थामा कार्यरत कर्मचारीका अतिरिक्त ब्यारेकमा रहेका नेपाली सेना, नेपाल प्रहरी, सशस्त्र प्रहरी, कारागारमा रहेका थुनुवा र कैदी अस्थायी मतदाताका रूपमा सूचीकृत हुन पाउनेछन्।

निर्वाचनमा खटिने कर्मचारी र सुरक्षाकर्मी, नेपाल सरकार, प्रदेश सरकार वा स्थानीय तहले सञ्चालन गरेको वा नेपाल सरकार, प्रदेश सरकार वा स्थानीय तहको स्वीकृति लिई सञ्चालन भएको वृद्धाश्रममा बसेकालाई अस्थायी मतदाता नामावलीमा समावेश हुन योग्य मानिनेछ।

अस्थायी मतदाता नामावलीका लागि सम्बन्धित कार्यालय प्रमुखले प्रमाणित गरी प्रमुख नाम दर्ता अधिकारीको कार्यालयमा पठाउने व्यवस्था गरिएको आयोगले जनाएको छ। ८ देखि २६ असोजसम्म सम्बन्धित निकायका प्रमुखले मतदाता नामावलीमा समावेश हुने व्यक्तिको नामावली प्रमाणित गरी प्रमुख नाम दर्ता अधिकारीको कार्यालयमा पठाउने तालिका निर्धारण भएको छ।

१ कात्तिकमा मतदाता विवरण रुजु गरी प्रारम्भिक अस्थायी मतदाता नामावली प्रकाशन गर्ने, २–३ मा प्रारम्भिक अस्थायी नामावलीमा छुट भएका वा प्रकाशित विवरणमा त्रुटि भएका व्यक्तिले नाम समावेश गर्न तथा त्रुटि सच्याउन निवेदन दिन सक्ने आयोगले बताएको छ। 

प्राप्त निवेदनमाथि जाँचबुझ गरी ४ कात्तिकमा संशोधित अस्थायी नामावली प्रकाशन गर्ने, ५–६ कात्तिकमा संशोधित अस्थायी मतदाता नामावलीमा नाम समावेश भएका व्यक्तिको सम्बन्धमा दाबी विरोधका लागि निवेदन पेस गर्ने, ७–११ कात्तिकसम्म दाबी विरोधको निवेदनउपर जाँचबुझ गरी निर्णय गर्ने तथा १२–१३ कात्तिकमा अन्तिम अस्थायी मतदाता नामावली तयार गर्ने कार्यसूची रहेको आयोगले जनाएको छ। आयोगका अनुसार १४ कात्तिकमा अन्तिम अस्थायी मतदाता नामावली प्रकाशन गर्ने कार्यसूची छ।