मुख्य दलहरूले समानुपातिक उम्मेदवारको सूची बुझाउन अबेर गरेकामा प्रमुख निर्वाचन आयुक्त थपलियाको व्यंग्य

काठमाडौं– समानुपातिकतर्फका उम्मेदवारको बन्दसूची बुझाउने अन्तिम दिन सोमबार ३ बजिसक्दा पनि मुख्य राजनीतिक दलहरू निर्वाचन आयोग नपुगेपछि प्रमुख आयुक्त दिनेशकुमार थपलियाले व्यंग्य गरेका छन्। राजनीतिक दलहरूको ढिलाइका कारण समानुपातिक प्रणालीतर्फको उम्मेदवारको नाम रुजु गर्न मंगलबार बिहानसम्मको समय लाग्न सक्ने उनले बताए।

दलहरू कुरेर बसेका कर्मचारीलाई भेट्न पुगेका थपलियाले आयोग परिसर पुगेका सबै दलको बन्दसूची बुझ्ने र मंगलबार बिहानसम्म लागे पनि रुजु सकाउन निर्देशन दिए। उनले समानुपातिक दल दर्ता गर्दा पनि दलहरू १२ भदौ अन्तिम समयमा पुग्दा १३ भदौ बिहानसम्म काम गरेको सुनाए।

‘विगतको अनुभवलाई समेत हेर्दा भोलि बिहान पनि आजै भइरहने हो कि भन्ने अवस्था हामीले महसुस गरेका छौं’, थपलियाले भने, ‘तर हामी सम्पूर्ण स्रोत–साधन र क्षमताले लोकतन्त्र बलियो बनाउने निर्वाचनको अभियानमा आयोगका तर्फबाट कमी हुन दिँदैनौं। आयोग परिसरभित्र छिरेका सबै राजनीतिक दलहरूले यही बसेर सबै काम नसकुन्जेल यहीँ बसेरै हाम्रा कर्मचारी परिचालित हुन्छन्।’

अहिलेसम्म आयोगमा ३ दलले मात्र प्रतिनिधिसभातर्फको उम्मेदवार बन्दसूचि बुझाएका छन् । प्रदेशतर्फ पनि ३ दलले मात्र बुझाएका छन्। आयोगले सोमबार साँझ ५ बजेसम्म समानुपातिक तर्फको बन्दसूची बुझाउने समय दिएको छ। कांग्रेस, एमाले, माओवादी केन्द्र, जनता समाजवादी पार्टी राप्रपालगायत दलहरू अहिलेसम्म आयोग कार्यालय पुगेका छैनन्।