घूससहित पक्राउ परेका उपसचिव र साढे १६ लाख सापटी दिने एयरलाइन्सका सीईओविरुद्ध भ्रष्टाचार मुद्दा

काठमाडौं– साढे २२ लाख रुपैयाँसहित पक्राउ परेका संस्कृति पर्यटन तथा नागरिक उड्डयन मन्त्रालयका उपसचिव प्रमोद नेपालविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ।

मन्त्रालयको नागरिक उड्डयन महाशाखामा कार्यरत उपसचिव नेपालले प्याराग्लाइडिङ सञ्चालनको अनुमतिपत्र (लाइसेन्स) उपलब्ध गराइदिने भन्दै बीबी एयरवेजबाट ६ लाख रुपैयाँ घूस लिएको अख्तियारले बताएको छ।

अख्तियारले उनलाई गत साउन १७ गते काठमाडौं महानगरपालिका–१ मनकामना मार्गको होटल अरण्यको कम्पाउण्डबाट ६ लाख रुपैयाँ घूस लिइसकेको अवस्थामा पक्राउ गरेको थियो। पछि उनले चढ्ने गाडीमा खानतलासी गर्दा १६ लाख ५० हजार रुपैयाँ बरामद भएको थियो ।

अख्तियारले उनले ६ लाख रुपैयाँ घूस लिएको र बाँकी १६ लाख ५० हजार रुपैयाँ बीबी एयरवेजका प्रमुख कार्यकारी अधिकृत हरिभक्त श्रेष्ठसँग सापटी लिएको बताएको छ। प्याराग्लाइडिङको इजाजतपत्र नवीकरणसम्बन्धी काम गरिदिएबापत बीबी एयरवेजका सीईओबाट सापटी लिनु भ्रष्टाचारजन्य काम नै भएको अख्तियारको दाबी छ।

अख्तियारले बीबी एयरवेजका सीईओ श्रेष्ठविरुद्ध पनि भ्रष्टाचार मुद्दा दायर गरेको छ। उनले काम गरिदिएबापत रकम सापटी दिनु भ्रष्टाचार मानिने अख्तियारको दाबी छ।