खुल्यो आउँदो चुनाव लक्षित म्यादी प्रहरी भर्ना

काठमाडौं– सरकारले आगामी ४ मंसिरमा हुने प्रतिनिधिसभा र प्रदेशसभा सदस्य निर्वाचनका लागि बिहीबारदेखि म्यादी प्रहरीको भर्ना खुलाएको छ। सरकारले आउँदो निर्वाचनका लागि १ लाख १५ हजार म्यादी प्रहरीको भर्ना आह्वान गरेकामा बिहीबारदेखि आवेदन खुलेको हो।

म्यादीमा भर्ना हुन आवेदन दिन बिहीबारदेखि  हरेक जिल्ला प्रहरी कार्यालयमा ठूलो संख्यामा युवायुवतीको भीड लागेको छ। म्यादीमा भर्ना हुन स्नातकोत्तर पासदेखि आमाहरुसम्मले निवेदन दिएका छन्। ४० दिने सेवावधिमा म्यादी प्रहरीमा छानिए प्रतिदिन ८६९ रुपैयाँका दरले ४० दिनसम्मका लागि व्यक्तिगत बैंक खातामा उनीहरुको पारिश्रमिक ३४ हजार ७६० रुपैयाँ दिइनेछ। 

यस्तै, खाद्यान्नबापत प्रतिव्यक्ति एकमुष्ट ७ हजार २०० रुपैयाँ दिइनेछ भने हिमाली जिल्लामा खटिने म्यादी प्रहरीको हकमा जिल्लाको न्यूनतम रासन दररेटअनुसारको रकम उपलब्ध गराइनेछ। पोसाक तथा अन्य सामान खरिद गर्न प्रतिव्यक्ति ६ हजार रुपैयाँ एकमुष्ट दिइने सरकारले बताएको छ। 

निर्वाचनमा खटिने म्यादी प्रहरीलाई खटिएको ठाउँ आउजाउ तयारीस्वरूप प्रतिम्यादी प्रहरी एकमुष्ट १ हजारका दरले तयारी खर्च दिइनेछ भने ३ सय रुपैयाँका दरले ४ दिनका लागि खाजा खर्च उपलब्ध गराइनेछ। अन्य सुविधा सरकारले तोकेबमोजिम हुने प्रहरी प्रधान कार्यालय मानव स्रोत विकास विभाग भर्ना छनोट शाखाले बताएको छ।

म्यादी प्रहरीमा भर्ना हुन चाहनेले ३० भदौदेखि ६ असोजसम्म जिल्ला प्रहरी परिसर काठमाडौं, भक्तपुर र ललितपुरसँगै सबै जिल्ला प्रहरी कार्यालयमा आवेदन दिन सक्नेछन्।