महारानी एलिजाबेथ द्वितीयको अन्त्येष्टिमा सहभागी हुन बेलायत जाँदै परराष्ट्रमन्त्री खड्का

काठमाडौं– परराष्ट्रमन्त्री नारायण खड्का महारानी एलिजाबेथ द्वितीयको अन्त्येष्टिमा सहभागी हुन बेलायत जाने भएका छन्। महारानी एलिजाबेथको १९ सेप्टेम्बरमा अन्त्येष्टि हुँदै छ। प्रधानमन्त्री शेरबहादुर देउवाका परराष्ट्र मामिला सल्लाहकार अरुण सुवेदीका अनुसार नेपालको प्रतिनिधित्व गर्दै परराष्ट्रमन्त्री खड्का बेलायत जाने भएका हुन् ।

उनको अन्त्येष्टिमा संसारका विभिन्न देशका सरकार र राष्ट्रप्रमुख सहभागी हुँदैछन्। अमेरिकी राष्ट्रपति जे बाइडेन, भारतकी राष्ट्रपति द्रौपदी मुर्मु, भुटानी राजालगायत महारानीको अन्त्येष्टिमा भाग लिन बेलायत जाने बताइएको छ।

७० वर्षसम्म शासन सम्हालेकी महारानी एलिजावेथको ९६ वर्षको उमेरमा गत बिहीबार निधन भएको थियो। बेलायतकी महारानी  एलिजाबेथ दुई पटक नेपाल भ्रमणमा आएकी थिइन् भने उनको निधनमा नेपालले तीनदिने राष्ट्रिय शोक घोषणा गरेको थियो।