निलम्बित प्रधानन्याधीश राणाले लगाएको आरोप पुष्ट्याइँ गर्न पूर्वन्यायाधीश फोरमको चुनौती

काठमाडौं– निलम्बित प्रधानन्यायाधीश चोलेन्द्रशमशेर राणाले संसद्को महाभियोग  समितिमा बहालवाला र पूर्वन्यायाधीशले भागबन्डा खोजेको र नदिएपछि आफूविरुद्ध खनिएको आरोप लगाएपछि पूर्वन्यायाधीश फोरमले पुष्टि गर्न चुनौती दिएको छ। बुधबार पत्रकार सम्मेलन गर्दै फोरमले आफ्ना सदस्यप्रति राणाले लगाएको आरोप पुष्टि गर्न चुनौती दिएको हो।

फोरमका कुनै पनि सदस्यले भागबन्डा वा सहुलियत नखोजेको दाबी गरिएको छ। फोरमका अध्यक्ष टोपबहादुर सिंहले निलम्बित प्रधानन्यायाधीश राणाले बयानका क्रममा आफूहरूप्रति अमर्यादित शब्द प्रयोग गरेको दाबीसहित संस्थाको ध्यानाकर्षण भएको बताएका छन्। 

‘संस्थामा आबद्ध पूर्वन्यायाधीशहरूको मर्यादामा आँच आउने गरी राणाबाट व्यक्त बयानप्रति पूर्वन्यायाधीश फोरम खेद प्रकट गर्छ। फोरमसँग आबद्ध पूर्वप्रधानन्यायाधीश वा न्यायाधीशले निलम्बित प्रधानन्यायाधीशसँग कुनै पनि कुराको भागबन्डा, सहुलियत वा सुविधा लिएको वा माग गरेको तथ्य पुष्टि गर्न चुनौती दिइन्छ,’ फोरमको विज्ञप्तिमा उल्लेख छ।

राणाले बयानका क्रममा पूर्व र बहालवाला न्यायाधीशलाई विभिन्न आरोप लगाएपछि समितिले उनीहरूलाई समेत बयानका लागि बोलाउने निर्णय गरेको छ।