भक्तपुर र काभ्रेबाट गहना लुटपाटमा संलग्न गिरोह पक्राउ

भक्तपुर- प्रहरीले भक्तपुर र काभ्रेबाट सुनका गहना लुटपाटमा संलग्न गिरोहलाई पक्राउ गरेको छ। भक्तपुर र काभ्रेका विभिन्न स्थानमा सुनका गहना लगाएका व्यक्तिलाई पिछा गरी एकान्तमा पारी गहना लुटपाट गरेको घटनामा संलग्न रहेको अभियोगमा प्रहरीले ६ जनालाई पक्राउ गरेको हो।

पक्राउ पर्नेमा काभ्रेपलाञ्चोक भुम्लु गाउँपालिका-९ ठेगाना भएका २२ वर्षीय बुद्ध तामाङ, उदयपुर त्रियुगा नगरपालिका-७ ठेगाना भएका २३ वर्षीय बिशाल राई, सिन्धुली मरिन गाउँपालिका-५ ठेगाना भएका २० वर्षीय आर्यन माझी, काभ्रेपलाञ्चोक भुम्लु गाउँपालिका-३ ठेगाना भएका २१ वर्षीय सुदिप भण्डारी, मोरङ शनिश्वरे नगरपालिका-८ ठेगाना भएका ४० वर्षीय चन्द्र बहादुर बिक र भारत महाराष्ट्र सिङ्ली घर भई काठमाडौं महानगरपालिका-७ बस्ने ३५ वर्षीय अमोल भोसले रहेका छन्। 

जिल्ला प्रहरी परिसर भक्तपुर र प्रहरी वृत्त ठिमिबाट खटिएको प्रहरीले लुटिएको सुन र लुटपाटमा प्रयोग गरिएको दुई वटा मोटरसाइकल सहित लुटपाटमा संलग्नमध्ये बुद्ध, बिशाल, आर्यन र सुदिपलाई पक्राउ गरेको हो। लुटिएको सुनको स्वरुप परिवर्तन गर्ने चन्द्र बहादुर र लुटिएको सुन किन्ने अमोललाई लुटिएको करिब दुई तोला सुनसहित काठमाडौं चाबहिलबाट पक्राउ गरेको हो। 

लुटपाटमा संलग्न अन्य व्यक्तिहरूको खोजी गर्नुका साथै यस सम्बन्धमा प्रहरीले थप अनुसन्धान गरिरहेको जनाएको छ।