सिनेमाघरलाई १५ दिनभित्र हल नवीकरण र कर बुझाउन बोर्डको ताकेता

काठमाडौं– चलचित्र विकास बोर्डले हल सञ्चालकलाई हल नवीकरण गर्न र कर बुझाउन १५ दिने अल्टिमेटम दिएको छ। बोर्डले पटक–पटक हल सञ्चालकलाई पत्र काटेर कर बुझाउन र नवीकरण गर्न आग्रह गरे पनि बेवास्ता गरेपछि समय तोकेरै अल्टिमेटम दिएको हो।

हल सञ्चालकले कर तिर्न बेवास्ता गरेपछि सोमबार बसेको बोर्डको बैठकले अल्टिमेटम दिएको हो। बोर्डले दिएको मितिभित्र हल नवीकरण नभए र कर दाखिला नगरे फिल्म प्रदर्शन अनुमति नदिइने निर्णय बैठकको छ। 

चलचित्र विकास बोर्डले २०७६ बाट बक्स अफिस प्रणाली लागू गरेको थियो। कोभिड महामारीका कारण लामो समय बन्द भएका हल १ चैत २०७८ बाट नियमित रूपमा सञ्चालनमा आएका थिए। तर हालसम्म केही चलचित्र घरको बक्स अफिस प्रणालीको सेन्ट्रल सिनेमा म्यानेजमेन्ट सिस्टममा डाटा प्राप्त नभएको बोर्डले १३ वैशाख २०७९ मा निकालेको सूचनामा उल्लेख छ।

सूचनामा आर्थिक ऐन, २०७८ अनुसार चलचित्रघरले विदेशी चलचित्र प्रदर्शन गर्दा असुलउपर गरेको चलचित्र शुल्कबापतको रकम प्रत्येक महिनाको शुल्क अर्को महिनाको २५ गतेभित्र बुझाउनुपर्ने र नबुझाए शुल्कको २५ प्रतिशत जरिमाना लाग्ने बोर्डले जनाएको छ । विद्युतीय प्रणाली प्रयोग गरी टिकट जारी गरिरहेका सिनेमा हलले बोर्डले तयार पारेको बक्स अफिस प्रणालीमा अन्तरआबद्ध भई आन्तरिक राजस्व विभाग र बोर्डलाई तत्कालै रियल टाइम डेटा उपलब्ध गराउनुपर्ने निर्देशन दिइएको छ। 

बोर्डले तोकिएको समयसीमाभित्र चलचित्रघरले बक्स अफिस प्रणाली कार्यान्वयन नगरे, चलचित्र विकास शुल्क नबुझाए र तोकिएको समय चलचित्र प्रदर्शन इजाजतपत्र नवीकरण नगरेको भए १५ दिनभित्र गरिसक्न आग्रह गरेको छ।